《造星IV》唔止一隊COLLAR　有成員連踩兩隊女團！

ViuTV節目《全民造星IV》誕生嘅新女團COLLAR人氣一時無兩，但其實《造星IV》嘅女團唔止COLLAR，原來仲有一隊Lolly Talk，當中成員包括有「造星最大遺珠」之稱嘅「阿妹」黃敏蕎、「女版周國賢」阿蛋（黃詠霖）、阿Yo（郭曉妍）、Tania（陳紀澄）、Elka（鄭芷淇）、Yanny（劉綺婷）、Sinnie（吳倩怡）及MeiMei（曾美欣），以及同樣係COLLAR成員嘅Day（許軼）！

早喺COLLAR成軍之前，佢哋就齊拍片翻唱前女子組合As One嘅歌曲《Candy Ball》，又拍片大玩女團綜藝，近日仲殺入年宵市集擺攤檔，雖然因疫情關係，計劃一度險叫停，不過最後成功由荔枝角轉場至尖沙咀繼續舉行，令粉絲相當期待！至於身兼兩隊女團嘅Day，似乎喺加入COLLAR後工作量大增，未能參與今次年宵，但從組合卡通Logo可見，佢依然係Lolly Talk嘅一分子。