還原21年前經典！周杰倫重演《雙截棍》MV大玩回憶殺

台灣天王周杰倫（周董）擁有唔少經典代表作，當年一曲《雙截棍》更係紅遍亞洲，而雙截棍亦成為佢嘅招牌，不時登台、演唱會演出都會大耍雙截棍。距離歌曲推出至今已相隔21年，呢日周董就還原MV中嘅「書法牆」場景，並再次表演雙截棍，見當年着黑色小背心嘅小子，現時已蛻變成成熟穩重、有型有款嘅天王，但功架依然未減，一樣耍得一手好棍，佢表示：「這個場景大家還熟悉嗎，還原了雙截棍的MV。」連好友五月天主唱阿信都高呼：「經典就是經典！」