電視城多人確診　無綫所有劇組全面停工

無綫電視城爆出新疫圈，除先後有多位員工確診外，今日（24日）再有藝員周嘉洛證實初步確診、新劇《法言人》有幕後員工確診，據知，有見現時多位台前幕後均中招，無綫所有劇組將全面停工，由今日開始到星期一（28日），當中包括曾有人確診嘅《隱門》、《法言人》及《回歸》、《曙光》，加埋每日開工嘅《愛．回家之開心速遞》、《破毒強人》。

稍後，無綫亦發出新聞稿，宣布停工消息：「本台今（24日）接獲通知，收到幾位職藝員同事通知發現初步確診，為保障職藝員同事安全及避免社區交叉傳播，本台已即時停止所有戲劇組錄影廠及外景拍攝工作，相關拍攝地方實時進行徹底消毒、深層清潔，以確保在絕對安全情況下才恢復拍攝。公司將繼續與衞生防護中心作出緊密聯繫，全面配合中心的防疫指引及安排。」

對於無綫停廠，正拍新劇《破毒強人》的張曦雯說：「停廠對我冇影響，因為我尋晚啱啱開完外景，之後呢個禮拜都冇廠景。不過，我當然要會小心防疫，因為之前病過唔想再病，同埋中過都唔代表唔會再惹到，所以一定要做好防疫措施。」而曹永廉則說：「冇影響，都冇擔心，公司有佢安全做法，跟公司做。」