瞞埋經理人︱陳喬恩今日下嫁馬來西亞富二代男友

台灣女神、42歲藝人陳喬恩同細自己9歲嘅馬來西亞富二代曾偉昌（Alan），因拍攝內地戀愛節目《女兒們的戀愛》而擦出愛火，二人穩定交往2年幾後，今日（31日）佢哋終於修成正果，一早去到台灣大安區戶政事務所登記結婚。而陳喬恩台灣經理人楊淑娟表示自己都係睇到報道先知道事件，更話有跟陳喬恩求證，確認佢哋真係登記結婚，佢話：「是的，他們今天早上登記結婚了，兩人感情穩定，大家都很祝福。」至於問到係咪懷孕，佢就話冇。而曾是「七朵花」成員之一嘅趙小僑，就話事前就知道呢件事，仲送上祝福，真係要恭喜晒喬恩啦！

而晚上陳喬恩亦在社交網上載與老公拖手戴婚戒的照片，並正式官宣婚訊：「簡單而不少，有你在身邊正好，身在福中，知福，謝謝大家的祝福。」又以英文向老公示愛：「Love you forever, my husband.（永遠愛你，我的老公。）」