楊千嬅仙氣現身央視舞台　獲官方發文公開表揚

歌手楊千嬅去年4月舉家移居上海，全力留在內地發展，而憑內地真人騷《妻子的浪漫旅行3》人氣再升嘅佢，過去一年工作不斷，頻頻亮相各大綜藝節目，包括《做家務的男人3》、《我們的歌3》、《誰是寶藏歌手》、《導演請指教》等，其中於《我們的歌3》甚至因工作撞期而提早退出節目，絕對係搶手貨，更有指佢吸金力強勁，半年輕鬆賺過千萬人仔。近日佢登上央視舞台，現身節目《古韻新聲清明》獻唱，以一身淺綠漸變色超高腰禮服傘裙上陣嘅佢，將杜牧嘅《清明》演唱成歌，配合埋身後古色古香嘅布景，以及煙霧瀰漫嘅舞台效果，即時仙氣十足，而央視官方社交網更上載其演唱片段，發文高度表揚：「楊千嬅唱出千年前的清明詩意，瞬間將我們帶回千年前那個細雨紛紛的時節。」網民均大讚：「楊千嬅的唱功毋庸置疑」、「仙女下凡啦」。