菊梓喬疫情暴肥體重破百 拒為吳卓羲下廚:佢大把嘢食

2022年04月05日 23:01
東網電視
更多新聞短片
生肖屬虎的菊梓喬(Hana)今年犯太歲,她聽從師傅指點走去箍牙,她說:「佢話牙齒整潔運程都會好啲,我本身好多爆牙,又唔想整假牙,同牙醫傾過咪箍牙,咁牙齒整齊對健康都係好事。」她要箍400多日,除了一日三餐,每日要戴22小時,她坦言最初箍牙時肌肉同頭扯到好痛,她說:「個人又忟,頭兩日瘦到不似人形,塊面似切扁咗。」Hana笑言不怕被人話整容:「2日削到咁好喎!我都覺得太瘦唔好睇,所以之後習慣咗已逼自己食番多啲嘢。」
疫情下Hana經常鑽研食譜,更想過做外賣速遞,鍾意打邊爐的她最叻整黃醉雞湯底,她說:「一、兩人分量好難整,所以我一煮就煮好多,然後速遞畀朋友試食。」可有送畀緋聞男友吳卓羲(Ron)?她笑說:「冇喎,我諗佢唔鍾意食。(你要請人食?)佢有要求,通常畀好close嘅朋友。(即係佢唔close?)佢大把嘢食啦。」雖然對方冇試過她的手勢,但似乎她對Ron的口味好清楚:「佢哋呢啲演員對飲食好執着,我好怕囉,唔食呢樣唔食嗰樣,我本身食得好肥膩好重口味,費事累啲要keep嘅朋友。」
Hana自爆已肥到過百磅,條腰由21吋變了25吋,上圍同下圍有肥嗎?她笑說:「緊係有,全身肥,個身有肉地,好彩啲褲仲啱着,淨係塊面唔肥囉。」她直認自己食得好誇張,又好零食同甜品,加上又冇得做運動,所以真的肥了,她希望4月底健康身能重開,她會上堂學番打拳,最近她在家中愛上睇摔角,她笑說:「我迷上咗一個日本摔角界明星,女仔嚟好靚,佢有日本林志玲稱號,我都好想學、想玩,第時睇吓有冇機會玩吓。」