一家三口玩轉澳洲！馬德鐘Keep得好同兒子似兄弟

視帝馬德鐘兒子馬在驤（Xiang）早前因影大學畢業照時，錫咗外籍男性好友臉珠，而惹網民揣測性向，不過馬德鐘事後就代兒子澄清佢哋只係班朋友喺度玩吓，叫大家唔使咁認真！近日佢哋兩父子喺社交網拍片同網民互動，片中睇到佢哋兩父子拍住上行Catwalk台型十足，馬德鐘留言：「走路也可以很酷。」而網民就將焦點落咗喺着住粉色衛衣嘅Xiang身上，因23歲嘅佢外表成熟，有網民話佢哋似兄弟多過似父子，網民仲搞笑話「兒子感覺好老」，仲有好多網民都話馬德鐘仲型過兒子，Keep得真係好呀！

馬德鐘夫婦早前赴澳洲出席兒子馬在驤大學嘅畢業禮，因一家三口好耐冇一同出埠，觀禮後把握機會喺澳洲四處旅遊，此行佢哋又食又玩，出海由早玩到晚，至欣賞燈飾，十分盡興。他們3人同樣茹素，發覺原來在澳洲都有好多選擇，而且賣相十分精緻，不過就算喺大學嘅校園內野餐也十分開心。馬德鐘夫婦之後因工作關係會先行返港，馬在驤就會繼續留澳洲攻讀碩士，馬太張筱蘭說：「原本佢讀機械工程系，碩士會改讀商科。（在驤想向商界發展？）未知，希望多元發展。」留了長髮嘅在驤，新造型更添星味，近日頻頻操水，為8月在澳洲的大賽「澳洲短池游泳錦標賽」準備，希望能拿下入場券，在泳界一展身手。