為靚靚大犧牲　迪麗熱巴自揭點樣變白到發光

內地頂流女神迪麗熱巴依家係收視福將，拍一套劇就紅一套，最近仲紅到去日本，挾27.4億播放量嘅舊劇《長歌行》都喺日本播，全球性吸粉絲。不過花無百日紅，要Keep住粉絲嘅心，個樣靚靚吸睛好緊要。

平時出名白到發光嘅迪麗熱巴，尋日（3日）就晒出佢外出摘士多啤梨嘅相，見佢為咗防曬要去到全副「武裝」上陣，口罩加帽仲要拉低見唔到對眼，加上佢全身包到冚，連好身材都睇唔到，喺夏天大太陽之下耐熱能力如此驚人，果然要靚係要大犧牲，難怪睇唔到樣同身材，粉絲都一樣收貨。