陳豪嫌棄同陳茵媺拍劇　傳授朱千雪造人秘笈

藝人陳豪及朱千雪上午到尖沙咀出席美容活動，談到貪靚，陳豪不諱言：「呢方面作為藝人係有責任嘅，因為幕前演出要帶Fantasy畀觀眾，即使我懶，老婆都會提醒及幫手。佢係專家。」陳豪更打趣自己「貪靚」嘅醒覺太遲：「不過遲到都好過冇到，容貌嘅嘢後天努力都可以改善。（依家點搞先得？）好似棵樹咁，得閒淋吓水、曬吓太陽，等佢極速生長，哈哈！」朱千雪則透露自從轉職後，自己反而可花更多時間顧及美容：「做多咗Facial同treatment，同埋今年係我入行10年，有個願望想回復10年前嘅狀態。（平時有幫老公護膚？）佢都係好懶，最好我話埋畀佢聽揸啲咩，甚至幫佢揸，咁我都比較多護膚品，有時同佢開心share。」

陳豪下月將夥拍太太陳茵媺開拍新劇，演情侶且有大量對手戲。談到太太復出，他表示：「講咗好多次我哋唔想喺螢光幕合作，咁會冇晒Fantasy，不過監製搵老婆傾咗好多次，咁我哋都相信佢，惟有交畀佢Handle啦。（你兩個一齊開工，3個仔女點算？）到時佢哋都開學喇，好啲囉，不過平時佢哋啲schedule，我哋都要花時間去處理，呢個一定嘅。」

朱千雪聞得陳豪與陳茵媺「合體」即大呼期待，不過她堅持目前時間上很難分配：「所以只能出席開活動見吓大家。（完全冇戲癮？）又唔係，尤其我媽咪喺加拿大會煲劇，我都想佢睇到個女喺螢光幕出現。（造人未？）隨緣啦，想回復10年前狀態滿足吓自己先，然後再諗下一步。（向陳豪取經？）其實我媽咪都係有3個女，可以嘅話我都冇問題。」陳豪聞言即搞笑謂：「有啲嘢一嚟就好快㗎喇。（有乜嘢傳授畀朱千雪？）Enjoy your life！」