東網電視
更多新聞短片
人氣男團MIRROR自紅館演唱會發生事故後一直停工至今，不過一班鏡粉冇忘記偶像嘅教誨，臨近中秋節，鏡粉就借偶像名義做善事，舉辦多個慈善及義賣活動應援，向社會基層送暖。其中Anson Lo後援會組成義工團，向長者派發月餅、生果及抗疫物資，老友記個個笑得勁開心，仲齊齊做出Anson Lo出歌曲《Megahit》招牌手勢，相當可愛，活動結束後有關機構亦頒發感謝狀及錦旗，答謝「神徒」嘅善心。
MIRROR感染一班「鏡粉」做善事。
「神徒」送月餅。
一班長者做晒《Megahit》招牌手勢答謝。
仲有感謝狀。
另外，陳卓賢嘅粉絲Hellosss，則以MIRROR作為主題，創作數百個日系和風提燈及六葉風車作慈善義賣，將所得款項全數捐助「兒童癌病基金」。而Alton嘅粉絲「蛋白粉」就去到觀塘及深水埗嘅長者中心派禮物，兼捐助500個飯盒，非常有心。至於向來愛動物嘅Anson Kong，亦感染到一班「生粉」出力幫助小動物，去到流浪貓狗之家做義工，並製作填色套裝捐贈慈善機構，希望畀有特殊需要嘅小朋友開心畫畫。
陳卓賢粉絲自製燈籠義賣。
仲有MIRROR嘅造型公仔。
