李元元自拍靚靚手指甲 驚變黑面公主

2022年09月22日 14:02
東網電視
更多新聞短片
愛美係人嘅天性,唔理3歲定80歲,最緊要有人讚自己靚,就好似藝人李璨琛女兒李元元(Lucy)咁,4歲人仔年紀輕輕但已經貪靚到暈,Lucy媽咪梁志瑩(Sophia)喺社交網上載片段後留言:「我覺得成件事好搞笑,當然佢唔知自己係KOL啦,但佢成日做埋晒啲KOL嘢,偷偷哋拍片問觀眾佢啲手指甲靚唔靚。」
原來Lucy趁媽咪睇緊電視,偷偷哋用媽咪部手機影相拍片,仲識得用濾鏡添,點知就變咗做「黑面公主」。佢又大晒佢嗰對指甲貼滿水晶嘅「肉手」,仲細細聲對住鏡頭問:「你睇吓係咪好靚?係咪好靚呀?」而Sophia就話經常睇番手機都會發現呢啲「黑材料」 ,每次都好驚喜咁話,真係畀Lucy笑死。網民亦似乎非常欣賞,紛紛留言:「真係好靚呀」、「Bling Bling指甲係咪自己黐㗎?」、「好欣賞佢啲女神Pose」、「明明李老豆同李老母係潮格路線,但Lulu變左搞笑公主風」,亦有網民話食緊飯差啲噴飯,但又好期待Lucy有日會自己開Live喎。