為定居地開火!莊鍶敏驚爆離婚難忍老公反口
20221107
東網電視
更多新聞短片
![](/hk/bkn/cnt/entertainment/20221107/photo/bkn-20221107224013123-1107_00862_001_01p.jpg?20221107232036)
「拿督千金」莊鍶敏(Jacquelin)兩年多前閃嫁台灣珍珠奶茶店老闆楊秉逸(Brian),並在女家的豪宅簽字行禮。2人婚後一直表現恩愛,又講明趕生B,惟近日卻驚爆正秘密辦理離婚手續!原來他們就定居問題出現嚴重分歧,Jacquelin難忍對方食言兼三觀不同,痛定思痛,決定好心分手。
42歲的莊鍶敏與台灣商人Brian拍拖半年後,無懼疫情並戰勝遠距離戀愛結成夫婦,2年多前在莊家的山頂大宅舉行婚禮。2人新婚不久就要分居,Brian飛返台灣處理業務,Jacquelin則留港工作,但仍處於熱戀期的他們對遠距離婚姻生活依然信心十足,趕造人的Jacquelin曾被拍得跟來港慰妻的老公買生蠔,又在公開活動上摸梁麗翹的孕肚沾旺氣,至去年7月,Brian更做「跟得老公」隨太太出席公開活動,閃爆全場!
三觀不同 難見未來
然而,Jacquelin近年將發展重心轉移內地,早前她稱Brian於8月會飛內地團聚,當時詐嬌表示:「我同佢講,如果你再唔過嚟搵我,下一步就係離婚,離婚先見!」原來她絕非戲言,而是感嘆出現婚變危機。據知他們的恩愛只是假象,Brian婚前曾承諾遷就太太,願意移居香港或內地生活,惟婚後卻「唔認數」,一味「拖字訣」,更反提議她出嫁從夫,移居台灣,令堅持夫婦同住的Jacquelin大感無奈。
結婚2年多以來,他們為定居問題爭吵過無數次,以往尚肯離台慰妻的Brian,最後一次與太太見面已是去年底的事。Jacquelin於5月慶祝生日,身在內地的她只收到老公的祝福短訊及利是,而早前說好的「8月見」亦以「放飛機」作結,Brian最近更明言不會離開發迹地。由於定居問題一直未能解決,加上三觀不同難見未來,為免浪費時間,雙方早前協議離婚,Jacquelin待完成手頭上的工作後,今個月就會返港正式簽字離婚,回復「單身貴族」身份。
財政獨立 不分身家
早前在內地完成無綫劇《狀王之王》拍攝工作的Jacquelin,接受東網獨家訪問時時直認正辦理離婚手續:「我哋成日為定居問題鬧交,之前佢應承嚟香港、內地陪我,最後佢話放唔低台灣嘅生意。呢個問題點都解決唔到,既然勉強冇幸福,根本走唔到落去,不如離婚啦!」問到夫婦間可有第三者?她說:「我呢邊就冇,佢嗰邊就唔知,基本上應該冇。」她坦言曾努力挽救婚姻,可惜徒勞無功:「離婚都覺得可惜,但佢都唔想同我傾,定居問題一直冇共識,唯一解決方法就係分開。」至於贍養費,她稱2人財政獨立,她不求贍養費,Brian亦沒有要求分她身家。
雖然異地婚姻失敗收場,但她不會因此有陰影:「係睇個人囉,唔關異地戀事!感情事隨緣啦,唔會諗再婚住,因為我事業為重,喺內地真係好多機會。」而其父母亦尊重她離婚的決定。
思明撐家姐夠硬淨
莊鍶敏與莊思明姊妹情深,之前齊齊在內地拍攝無綫劇集《一舞傾情》,日對夜對。對於家姐離婚一事,思明受訪時坦言:「我知呢件事,佢有同我哋講,不過呢啲始終係佢自己嘅嘢,最好都係由佢自己講番。」問到家姐之前拍劇心情可有受影響?她說:「冇喎!OK嘅,佢不嬲都硬淨同樂觀,所以唔使好擔心,佢咁大個人,呢啲嘢自己識得處理,我有Keep住同佢傾偈,佢依家心情OK。」
另外,思明在社交平台上載與男友楊明撐枱腳的照片,並發文:「好似好耐冇出去食飯啦,等我減完肥之後要食餐勁嘅!」問到現時是否已減肥成功?她笑說:「未成功呀!呢排已經食得好清、好寡。(肥咗好多咩?)又唔係,只不過之後台慶有個表演,件衫都幾性感,所以諗住Keep fit啲!」