項明生新節目帶團日本環島遊 觀光局派員迎接國家級款待

2022年12月04日 20:00
東網電視
更多新聞短片
「旅遊達人」項明生(James)早前聯同3位TVB女藝員帶團到日本環島遊,行程拍成旅遊節目《45日還遊日本》,他更以日本食品型容各主持不同風格,包括高貴美麗的懷石料理張寶兒、活力四射的讚岐烏冬姜麗文,及親民貼地的九州拉麵蔣家旻。
James接受訪問時表示原先行程是重拾青春之旅:「當年讀完大學去過兩次環島,咁耐冇飛,加上嗰陣仲要隔籬14日梗係要玩返夠本,度完行程計過要玩個半月,心諗都唔會有人同我癲啦?玩45日邊有咁多假?當時仲要攞簽證咁麻煩。」他表示有幾位多次跟他飛日本的團友,知道他度好行程便要求他帶團一起出發:「佢哋都係退休人士,有十幾人,再加上十幾個新團友,大家有時間又有啲錢,因為咁耐冇去一定要食好住好,所以團費唔平,其中有間酒店喺日本網站評分最高,每晚住宿費15000港幣。」除了住得豪,食方面亦所費不菲,他表示因為當地防疫要求,所以他們需要包餐廳用膳,最貴一餐每人花費3000多元,全程需租用大型旅遊巴,因此團費每人約30萬港元,絕對稱得上是超級豪華團。
因他們是日本重開旅遊後的第一團,所以一到日本機場便有當地電視台守候訪問,行程中有9個點更有日本觀光局派員迎接,James笑言是國家級款待:「呢啲真係有今生無來世,有錢都未必買到,啲團友夜晚返到酒店即刻開電視睇自己訪問片段,哈哈。」
James直言今次行程十分盡興,很多以往人山人海的景點,今次可以停低慢慢細看兼打卡,行程去到尾聲時更有團友不捨流淚:「有團友未去完已經叫我再搞團,仲出銀彈攻勢,買咗好多靚衫送畀我又封大利是,叫我快啲搞日本楓葉團。」《45日環遊日本》現正熱播中,亦是James首次邊帶團邊拍節目,他笑言怕怕試一次便夠:「今次真係博到盡,又要帶團又要拍節目,每日都唔夠瞓攰到死,真係頂唔順,係第一次亦可能係最後一次,哈哈。」