谷旻自爆患情緒病　2年前曾想過輕生

樂壇新人谷旻(Alice) 日前出席頒獎禮記者會，跟同屆新人、歌手同業交流音樂，和陳葦璇合照留念。問到對新人獎信心？她坦言：「唔係咁大，因為自己係獨立歌手，有獎當然開心，會覺得獲認同，但冇都冇所謂，咪當見吓同業，同埋去個大派對。」

她又透露稍後推出微電影MV《逃》，花費約15萬，因申請到政府資助，所以只須自掏萬元腰包便成事：「其實製作費都好高，因為首MV嘅背景係90年代，會去番梅艷芳以前拍過嘅場景取景。」自言收入不高的她，問到要「貼錢」開工可覺不值？她卻認為追求理想不應因金錢衡量，加上新歌帶出的訊息可幫忙同路人：「其實首歌係想帶出患情緒病唔係件醜事，我兩年前都患咗抑鬱同焦慮病，可能嗰時家庭、工作及感情統統都出現問題，所有嘢堆埋一齊嚟，令自己情緒釋放唔到，喺病情最嚴重時，我有諗過自殺，但捱過咗最困難嘅時候就冇事，依家繼續有食藥。」她覺得就是因為自己經歷過，所以想創作一首歌，希望借助音樂力量幫助到受情緒困擾的人，有機會找到出口。