秦嵐疑撻着楊冪前男友　魏大勛被揭專吼熟女

內地女星秦嵐憑《延禧攻略》成功爆紅，不過佢最出名係明明已經43歲，但外形就似足20幾歲索女，過去更曾同影帝黃曉明有過一段情。近年一直單身嘅佢，忽然爆出新戀情，有內地媒體稱手上有佢同新歡拍拖嘅親密片，更指對象唔但只細佢10歲，仲係楊冪前緋聞男友，網絡即掀起熱議。

網友即聯想到佢嘅新仔，就係新劇《關於唐醫生的一切》中同佢有感情線嘅魏大勛，二人有唔少精彩對手戲，依家更疑似擦出愛火，被目擊喺三亞約會，仲似乎已經係埋一齊一段唔短嘅時間，對於爆料，雙方都尚未作出回應。反而係網友發現，33歲嘅魏大勛似乎係「熟女殺手」，位位緋聞女友都比佢年紀大一截，好似係41歲嘅馬蘇、36歲嘅當家花旦楊冪等，依家再同秦嵐傳緋聞，女友年齡差愈嚟愈大。