鍾鎮濤擔任《中年好聲音》評審　大讚參賽者好有特色

無綫綜藝歌唱真人騷《中年好聲音》明（19日）播出一集，將展開第五部曲首回合《雙人合唱！二選一離場！》晉級16強的選手將分成8組表演合唱歌，最低分的一組將會淘汰一名選手，而今個回合的嘉賓評審是鍾鎮濤(B哥哥)。

根據分組情況，「大魔王」吳大強與網上人氣極高的顏志恒絕對是「強強聯手」，兩人大唱《總有你鼓勵》睇頭十足，B哥哥賽前都話睇好兩人：「兩個聲音都好有特色。」雖然大強和志恒年齡相差接近30年，但無礙兩人合作，張佳添大讚：「好有Bromance嘅感覺，仲有突如其來嘅感動。」鍾鎮濤更直言聽到眼濕濕!

獻唱《相愛很難》的周吉佩（吉吉）、林鉫徫，賽前已笑言「唔過電」，吉吉說：「望住佢冇毛管戙，只係覺得唔係好啱數咁！」雖然兩人把口就話唔過電，但造型上襯到絕，齊齊以「黑白雙煞」Look 上陣，台風十足。此外，吉吉的太太帶同兩位小朋友到場支持老公，家姐周洛澂帶住細佬周煥林上台送花，細佬更萌爆拉票：「爸爸唱得好好聽，大家唔該拍手。」非常可愛！