17歲炎明熹再增高突破1米7　廣州登台成全場最高

「聲夢人氣王」炎明熹（Gigi）憑節目《聲生不息》於內地一炮而紅，演出機會不斷，甚至獲邀於央視春晚演出。去年佢參加《聲》時曾自我介紹時表示：「我是炎明熹Gigi，身高170，體重不告訴你啦當然！」不過相隔近1年，現年17歲嘅佢近日現身廣州商演，就被發現繼續發育，身高突破1米7，同觀眾合照時更高人一等，幾乎係全場最高，連粉絲都忍唔住直呼「高妹Gigi」！其實佢1月客串處境劇《愛．回家之開心速遞》時，已見佢比身高173cm嘅林淑敏高，並與身高177cm嘅呂慧儀平頭，相信佢嘅身高仲有上升空間。