DSE放榜︱黃明德18分超出預期　急報大學

英皇歌手黃明德（Dark）係今屆DSE考生，今日（19日）一早佢就出Post自拍，見佢喺車上影相，似乎係已經出發返學校賽馬會體藝中學等拎成績單，搞到粉絲都戥佢緊張埋一份，等佢公布DSE成績。不過佢未出發先興奮，前一晚都仲係咁出story，宣傳新歌及工作之餘，仲自爆前一日就急急去做Gym緩解緊張心情。早前佢就表示最想入大學讀歷史科，仲話驚放完榜就喊晒，好鍾意歷史嘅佢，今年揀咗讀中、西史，又話第時去博物館返工，或者做老師教中、西史，充滿憧憬。

稍後佢就透過公司帶嚟好消息，本身預算自己只得15分左右嘅佢，最終考獲5科18分成績，共考得20分。中文科作文更有5分，大大拉高中文科有4分，即轉plan報讀大學：「我本身expectation係15、16分，諗住大專駁上去大學學位，但係今次已經係over expectation，可以報到好多大學degree課程！最surprise係中文攞到4分，估唔到自己語文係攞到4分，本身冇諗住報JUPAS（大學聯招），諗住讀asso（副學士）再轉去大學讀歷史系，不過同好多老師傾完，依家可能先放棄讀歷史系，報咗大學之後再轉科。」