搵番爸爸！裕美赴日見親父　世紀重遇終生無悔

中日混血兒裕美與親生父親失聯逾20年，年前佢放下對父親嘅仇恨決心尋父，試過網上尋人及到香港日本領事館交低資料等，去年有熱心網友喺網上搵到一個同裕美爸爸同樣名為「和田具久」嘅社交網用戶，對方頭像更係裕美嘅童年照。幾經波折，裕美今次真係搵番爸爸！

佢喺社交網上載兩段同親父世紀重遇嘅片段，當中包括一家三拖手片、一家三口合照等，令人不勝動容，留言表示佢去到日本「千里尋爸」，成功與爸爸見面，童年父母經常嗌交，甚至動武嘅恐懼亦一一釋懷：「我得咗啦！我死而無憾，世上一切都不再重要。二十幾年沒見，我真的好想你，爸爸！久别重逢，百感交集，千言萬語盡在不言中。

家和萬事興！搵到爸爸，我心願已達成。爸爸還是自己一個人，今後我會時常回日本陪你！爸爸同我講如果我哋喺香港唔開心，隨時回來住吧。我會的💕我愛你爸爸、媽媽。你哋係我心目中是最最最最重要的！人生沒有比這更重要！感謝天父你聽我祈禱」

裕美又言一直以為自己係似媽咪，點知見到父親後，先知原來自己果然係二人結晶品，佢同父母都咁似樣，難掩興奮之情！

裕美接受東網訪問，詳談「尋爸」經過，她仍難掩興奮心情，在受訪期間她表示：「爸爸啱啱打電話嚟，真係好開心。」美美表示早在2007年拍《雪映移城》節目時，她曾寄過禮物給爸爸，當時被打回頭，因為該址沒有此人，之後她即展開尋親。

去年有網友在一個社交網發現一個跟她爸爸同名和田具久的帳戶，對方的頭像是她的童年照，當時她即刻開新帳戶嘗試聯絡對方，因為如果是冒認的人必定會跟她聯絡，但一直沒有動靜冇回應，當時她覺得即使社交網真的是爸爸，也是有人幫他開戶，因為爸爸不會用這些新科技。到今次往日本傾生意，媽媽忽然表示想跟她同行，並透露想重返舊居睇吓，她笑說：「阿媽去旅行就成間屋翻起晒咁執行李，結果搵到本簿，簿內有爸爸三個唔同電話號碼，我即刻試打，但都打唔到，後來我託日本嘅朋友試打爸爸嘅一個手提號碼，結果真係打通咗。」

美美表示朋友跟爸爸通話一次後又失聯，她估計可能是日本詐騙電話都好嚴重，因為網上隨時可以攞到照片，當她去到日本工幹，收工就喪打爸爸個電話，打了好多次後爸爸終於肯定，一家人傾足40分鐘電話，但爸爸都不肯出來見面，她說：「我覺得佢都係有懷疑，佢叫我傳啲相畀佢睇，我傳咗好多，佢都唔認得我，最後我傳咗篇尋父報道畀佢睇，有我個樣同以前我哋一家人舊照。」翌日爸爸即刻聯絡她日本朋友搵她，並答應出來見面，她說：「見到佢真係開心到喊，爸爸話見到啲相嚇親，佢完全認我唔到，唔肯定係咪我嚟，但我哋三人傾完電話嗰晚，佢興奮到凌晨兩點都未瞓到。」

美美更開心的是父母一直沒有離婚，她說：「爸爸依家都係自己一個人住，佢話一直好掛住我哋，我哋臨返香港時，佢話佢好愛我，又同阿媽講好愛佢，一直好愛我哋，就算死咗都會愛我哋千年萬年，好sweet呀，我發現我阿爸sweet過我阿媽，因為阿媽從來都唔同我講愛我。」爸爸好想她們返日本住，她自己都想：「佢仲想幫我準備啲嘢，日本嗰邊啲人好好，我喺香港真係唔係好開心，但喺香港建立咗好多嘢，又想搵多啲錢畀佢哋兩個，阿爸話我唔需要你畀錢，佢話最緊要我開心同健康，但我覺得要盡自己職責，不過將來我都會多啲返過去見佢。」

在日本一家人相聚了四、五天，爸爸帶她們去了很多老地方：「又講阿爺以前好多嘢，又帶我哋去佢讀間大學睇，又同我哋又摘葡萄，我負責揸車同佢哋周圍去，見番佢我真係死而無憾，人生在世再冇一樣嘢係重要，我又教佢點用電話，拍咗啲教學片畀佢，佢好努力去學，佢依家日日打電話畀我，日日同佢講日文，我都講番好多日文，其實我識聽八成，識睇識寫，但只係講得冇阿媽咁叻，佢仲話我發音幾準，以前有仇恨，唔鍾意爸爸，但依家要快啲pick up番啲日文先。」