公開告急︱謝安琪Marf合體音樂節門票僅賣三成

歌手謝安琪（Kay）、COLLAR成員邱彥筒（Marf）、雲浩影、周國賢和湯令山等一連兩場的《未來音樂祭》音樂節將於9月30日及10月1日在亞博舉行，另外大會亦請來台灣的安溥、韋禮安助陣，陣容以大堆頭為主。日前音樂節主辦單位TONE Music忽然公開發文，直指目前為止只賣出不到三成門票，原本唔打算告急嘅佢哋都承認冇得選擇，盼歌迷可以購票入場支持，打慘情牌谷飛。

TONE Music於文中表示過去幾年一直尋求突破，請嚟唔少音樂單位參與，希望畀大家見到香港音樂質素嘅可能性，今次更會增添飲食攤檔、流程安排、舞台距離調整等。不過有網友質疑TONE Music賣慘，加上今次音樂節票價貴疑食水深，亦有人指表演場地隔涉、歌手陣容唔吸引、舉辦日子撞正中秋節等假期、同一時間有唔同音樂演出舉行等。據了解，音樂祭舉行兩日，香港其餘場地分別有sukekiyo及LE SSERAFIM演唱會、安孝燮見面會等。