周潤發深水埗食飯搭枱　網友驚訝冇人理影帝

周潤發深水埗開餐竟然要搭枱！早前影帝周潤發（發哥）就公開笑談捐56億巨額身家真相，平時亦成日被偶遇，大家都喺行山、食飯時都見到佢，加上佢愛貼地玩selfie，港人喺街見到佢都見怪不怪，不過對於內地來港玩嘅網友，佢哋就絕對係遇見巨星！

最近有網友去深水埗食飯時，就見到發哥入內，網友即時拍片記錄，不過當佢見到店內市民對眼前嘅周潤發未有過大反應，入坐時發哥仲要同人搭枱，令佢對香港巨星嘅排場有另一個印象，大讚佢貼地，亦驚訝冇人理影帝。

其實周潤發今次光顧的小食店，絕非普通貨色，雖然價格親民，但已連續多年獲得米芝蓮街頭小食推介，其中以混醬腸粉最為著名，係「星級」米芝蓮小食店。