中年好聲音2︱顏米羔「唱爆」蘇芮金曲　伍仲衡：要識收！

無綫歌唱真人騷《中年好聲音2》26強選手，於最新一集爭入24強，最亮眼選手非顏米羔莫屬，被喻為「顏志恒2.0」的他獻唱蘇芮的《誰可相依》，演出時充滿爆炸力，去尾聲更唱至青筋暴現，最終獲得88分佳績，獲評審李蕙敏大讚：「你把聲好放，完全唔覺得你有緊張，除咗悲苦仲有一種Rock嘅感覺。」而伍仲衡則略嫌顏米羔太過爆：「我成日用玉置浩二做例子，佢唱嘅Verse唔使點爆，我已經好感動，你爆冇問題，但要學識收。」

而曾獲兩次5盞燈的「10燈魔人」陳俞霏，則獻唱葉蒨文《女人的弱點》，梳All Back頭上陣的俞霏型格十足，今次收起「Chill風」企定定深情獻唱，最終獲得82分，不過伍仲衡卻嫌她唱得不夠溫柔：「成首歌都好惡，好似『惡女的弱點』。」張佳添則直指她計錯數：「開頭你要唱得Soft啲，你後面嘅爆先會畀我哋感受到，你依家係『女人的爆點』。」