陳靜Bra Top騷導彈胸　畀型男圍住跳脫衣舞勁怕醜

藝人陳靜（DaDa）今日戰鬥格Bra Top上陣，大晒心口及小蠻腰，以嘉賓身份現身韓國音樂劇《WILD WILD》記招，同來自韓國嘅三位大隻仔姜天一、李國榮及鄭漢三見面。一開始大會安排DaDa坐喺高櫈上，3位型男出場時西裝骨骨，之後圍着DaDa跳舞，仲要邊跳邊除衫，最後更係赤裸上身，搞到DaDa全程唔敢直望，只係掩嘴甜笑。

DaDa笑稱第一次睇猛男騷，有少少尷尬，但覺得佢哋都跳得好出色，好想嚟見識下，又解釋唔敢直望，係因為覺得自己應該喺台下做觀眾會比較好，下次想帶埋好友一齊睇騷。DaDa透露自己一向鍾意肌肉型男仔，係揀男朋友嘅條件之一，再加上近排自己都鍾意做運動，所以笑言拍拖唔需要男朋友帶佢去食高級餐廳，帶佢行山做運動就夠。隨後更自爆現階段有了解中嘅對象，並搞笑稱其中有啲係「少了解」、有啲係「中了解」，但只得一個人係「深度了解」。