連詩雅誕下5.9磅B女Camila 陳家樂剪完臍帶爆喊
2024年07月18日 19:02
東網電視
更多新聞短片
![](/hk/bkn/cnt/entertainment/20240718/photo/bkn-20240718190220024-0718_00862_001_01p.jpg?20240718234410)
藝人陳家樂(Carlos)同老婆連詩雅(Shiga)去年4月24日正式拉埋天窗。早前分享喜訊表示懷有身孕的Shiga,今日正式卸貨B女Camila出世,恭喜晒。
小公主Camila重5.9磅,初為人父的家樂剪完臍帶既興奮又感動,抱着Camila爆喊!見他喊到雙眼通紅,相當感動。寵妻號的家樂陪住太太入產房、親手剪臍帶,見證小公主誕生,看到囡囡眼仔睩睩,腳撐撐,心情更是久久不能平復,語帶激動說:「BB啱啱出咗世,好開心!出嚟已經非常之活潑,喺度到郁手郁腳,佢哋話隻眼似媽媽,個鼻同口似我,但我唔係好分到,宜家仲有啲緊張有啲頭痛,頭先都幫BB剪咗臍帶,個經歷係好特別,好煙韌…我唔識講。」
新手爸爸陳家樂表示:「我以為自己好唔緊張,可以好冷靜去安撫住太太生BB。諗左1000個笑話500個爛gag,結果入到產房我係緊張到有種窒息感,一個都講唔出。唯一講到出口既,只有一句I love you。其實呢段時間,我覺得自己好唔負責任,臨生前幾星期飛左去拍劇,一路都好擔心,但陳太真係好堅強照顧好自己,仲做好晒準備功夫。BB今日平安出世,媽媽係最偉大。」
初為人母的Shiga同樣緊張,未正式推入產房時上身已經緊張到不停震,最後需要打了很少量鎮靜劑平復心情,Shiga說:「之前真係好緊張,上身不自主在震,但到生嘅時候又發現冇想像中咁痛,囡囡又好乖好快就出嚟,見到囡囡出世一刻,好興奮、好感動,咩痛都唔記得晒!更神奇係囡囡喊嘅時候,只要抱佢係自己身邊,佢自自然唔再喊!」剛生完Shiga表示感覺是有點疲累,但為了囡囡健康,已嘗試餵人奶,在看到囡囡嘴郁郁手撐撐,所有痛、辛苦都變得值得,完全感受母愛偉大!