奧運閉幕禮　湯告魯斯特工上身從天而降接棒被中女突襲強吻

巴黎奧運閉幕禮周一凌晨（12日）假巴黎法國球場舉行，如開幕禮一樣，閉幕禮亦是話題十足，一輪表演完畢後荷里活巨星湯告魯斯（Tom Cruise）壓軸出場「從天而降」接手奧運旗。一名女子就在他降落後向他「偷襲」成功連環嘴，即被網民鬧爆！

在表演嘉賓之一的美國R&B女歌手H.E.R.演唱美國愛國歌之後，現場即響起電影《職業特工隊》（Mission:Impossible）的經典主題音樂，而「靚佬湯」複製他於片中的招牌動作於球場頂上「一躍而下」空降球場，降落後他即步行至舞台，期間一名懷疑是運動員的中年女子向他「偷襲」強吻，片段事後於網上瘋傳，片段中見到那名「猴擒」女子拉住湯的頭連吻兩邊臉頰在旁的人士見狀即狂笑拍手，而那女子還拎住手機邊嘴邊自拍，認真狼死！不過身經百戰的湯冇「黑臉」繼續保持笑容繼續前行，他亦有停下與其他運動員自拍。大部分網民均鬧爆那名「運動員」的行為不怡當，有網民留言反問：「佢嘴之前有冇經過湯批准先？！」另有網民說：「如果雙方性別調轉，成件事就會唔同！」更有網民批評行為不尊重湯:「湯告魯斯喺奧運開緊工然後被人錫，而在場大批人士竟然仲嘻哈大笑，完全唔尊重阿湯，簡直令人作嘔！」由於2028年下屆奧運將於美國洛杉磯舉行，奧運五環旗降下後交給洛杉磯市長巴斯（Karen Bass），並由她將奧運會旗轉交給「靚佬湯」。之後他將會旗插在電單車尾並駕車駛離現場，大批運動員夾道歡送他，直奔機場將電單車駛進軍機內並飛返美國將五環旗送到洛杉磯。現場亦播放事前預錄「靚佬湯」跳降傘「空降」洛杉磯的片段，更在荷里活知名地標上加上奧運五環，象徵他已經將奧運旗遞交給下一個主辦單位。事後「靚佬湯」都在自己的社交網分享球場頂上自拍照並留言表示：「謝謝你，巴黎，現在出發去洛杉磯吧」。

就在「靚佬湯」傳遞五環旗到洛杉磯，當地的海灘亦隨即舉行一場大型音樂會，一眾美國樂壇當紅歌手包括Billie Eilish、Snoop Dogg以及樂隊Red Hot Chilli Peppers等輪流獻唱，場面熱鬧！