東網電視
更多新聞短片
飛哥牌洗衣機大家還有印象嗎？
法國白朗、美國飛哥、意大利雙子星呢啲老牌家電品牌年輕一代可能唔係好識，不過喺五、六十年代佢哋不知幾巴閉。品牌本地代理商太平洋行行政總裁施國耀就曾經講過，當年買得起一部冷氣機，就好似今日買到架「賓士」咁架勢，係身份嘅象徵。尋日大昌行(01828)宣布收購太平洋行七成股權，唔知易手之後呢批響噹噹老字號家電能唔能夠殺出一條新血路呢？
大昌行舊年話大搞內地網上零售平台，雖然當時管理層話主力做食品生意，不過而家收購咗咁大間分銷商，呢道可能係打入內地市場嘅「任意門」，幫旗下家電網銷到內地。
呢堆外國明星老牌推出嘅產品一啲都唔老套，好似意大利雙子星牌咁就有集齊煎、煮、炒、炸、烤、蒸等於一身嘅煮食機、無油煎炸鍋、麵包機等新潮家電，迎合好似絲絲呢啲追求簡易、健康煮食嘅消費者。
講返單刁，大昌行今次斥大約2.95億元收購太平洋行70%股權，代價由公司內部資源撥付。而翻查資料，原來九九年馮氏集團(前稱利豐集團)都曾經收購太平洋行，公司無透露馮氏家族仲有冇持股，大昌行同馮氏有無合作機會，大家可以拭目以待﹗
