m18講場：Google大神話Emoji跑褲最潮

「Google Google，話我知，呢個世界上邊啲衫最潮？」Google大神話，依家最潮係emoji印花跑褲同薄紗半截裙。冇花有假唔係吹水，完全有大數據支持，係根據2012至2015年嘅服裝搜尋數據所得，總共60億項搜尋，無錯，係60億項！

Google仲將呢啲資料整合，嚟出時裝潮流報告，一年出兩次。Google啲時裝客仔包括Wal-Mart、Target Corp、Gap同Kate Spade & Co.，啲資料唔講得少，絕對係時裝網店嘅寶藏。個報告仲教啲時裝網店，要吸引啲80後90後幫襯，首先係要有片！佢哋仲講埋，邊個時段對啲時裝網店最重要，一定要有人守住，原來係晚10到朝4。點解？假設你係一位有責任感嘅打工仔，大概都只有呢段時間會上網買嘢。

不如講番潮，Google大神話，超窄緊身牛同單膊泰山裙，可以扔得。至於乜嘢嚟緊會興？除咗emoji跑褲同薄紗裙外，竟然就係及膝裙，佢嘅搜尋次數過去三年升咗九倍！話仍然係個初浪中，仲有排Hit。不過有樣興緊嘅，包你估唔到亦睇唔出，係乜？係腰封。