網民熱話：GoGoVan顛覆傳統　香港驕傲Go！

《東網財經》及《money18》周二報道了港產初創公司(startup)成功例子之一的電召貨車應用程式GoGoVan(高高客貨車)。這間2013年成立、最新估值料已急增至3億美元(約23.4億港元)的港產公司，起始資金竟只約數千元，如斯本小利大，惹起網民極大迴響！

話說GoGoVan聯合創辦人Reeve當年在美國升學時認識了Steven及Nick，3人回港後原先合作做飯盒廣告生意，但規模漸增後，遇到沒有貨車送貨的困難，察覺傳統電召貨車費時失事及有配對落差，從而激發他們構思，可簡化call車流程的應用程式。

網民看畢他們的成功故事後，都讚賞這個故事「夠勵志，值得年輕人借鏡！」其中創辦人由做飯盒廣告開始，發現叫街車困難之處，到今天的成就，「可見創意比眼前小利更可貴。」只要年輕人有「好Idea + 毅力 ＝ 一定得！」是「A great Cyberport start-up story.(一個很棒的數碼港初創公司故事。)」

有網民就話：「真心覺得呢幾條友勁到痴線，正常人點會諗到呢種概念，就算以前call車有困難，頂多呻一呻，呢幾條友可以發展為商機，顛覆整個運輸業界，創業真係好講智商。」總之一句：「撐，香港驕傲！」

不過，也有網民擔心GoGoVan將來的競爭力，「例如用競爭對手之一的Uber，由天水圍去屯門，車費可以較GoGoVan便宜40元。」眼見GoGoVan成功，有網民亦覺得「未來可能會出現好多類似的app，例如快快van、人人van、move van等。」

另外，報道提到，GoGoVan雖然市值億億聲，但並未實現盈利，而創辦人又每日工作十幾個鐘，有網民擔心融資筆錢夠佢幾年運作，兩年都未搵到revenue model(回報模型)，是否waiting die(等死)？與此同時，個app亦都好容易畀人抄，「勸戒不要因有人埋欄同有用家增長，就覺得錢賺唔賺已經無關係。」

網民睇到創辦人終極目標想把GoGoVan帶到全世界，立即提醒政治生態是計時炸彈！「呢啲call車中介，呢一刻值幾錢無咩用，政府一句監管即刻玩完，好似Uber咁，已經好多城市ban(禁)咗。」

網民都算係用心良苦，希望GoGoVan能實現夢想吧！