m18講場：你揀銀行同大部分港人有冇唔同？

東網電視

唔睇結果，你一定估唔到18至24歲呢班生力軍最常用係邊間銀行。

香港人打開銀包閒閒哋都有10幾張卡，但花心嘅你又用開邊間銀行嘅服務為主？金融業智庫RFi Group啱啱公布咗《2015年環球零售銀行業交叉銷售報告》，想知你同大部分港人有冇唔同？埋嚟睇過。

報告話，香港人主要用開嘅銀行第一位係滙豐，中銀香港同恒生就分別排第二同第三。呢個結果，都幾乎預咗。

不過，年輕一輩有另一套選擇。估吓18至24歲呢班生力軍最常用係邊間銀行？跑出嘅竟然係中資行中銀香港！而恒生穩守第二，獅子行就只排第三。

究竟何解喺年輕人當中，中資行會撼贏本地銀行？RFi Group亞洲區總經理Gerald Ferguson話，可能因為近年好多內地人嚟香港讀書同做嘢，佢哋係喺內地用開中行嘅服務，所以嚟到香港都傾向揀番子行中銀香港，加上子母行之間匯款方便，所以帶動中銀香港榮登後生一族嘅龍頭大佬。

變幻原是永恒，話唔定呢班生力軍第日就貪新忘舊，遲下排名又大洗牌呢？Sorry喇，RFi Group顧問服務部董事總經理Alan Shields話，一般人喺25歲左右揀定主要銀行後，好少會再轉嚟轉去，預期中銀香港嘅市佔率未來10至15年仲會繼續增加。換言之，銀行Mark客要趁早。

香港人成日話科技配套係本地優勢，但報告話其實香港人唔多鍾意用E-Channel，比起已發展嘅亞太區市場同新興市場少好多。而咁多港銀入面，花旗香港嘅客算係最「電子化」，有34%係電子平台參與度極高嘅一群，大幅拋離其他港銀。

●城大計量風險管理學系學生Christy - 恒生、創興、花旗

「入U時喺恒生開咗個綜合儲蓄戶口，順便開埋張信用卡，依家都一直用緊，因爲夠放便，總有一間恒生喺附近，而且大銀行有保障嘛！

3年前亦喺創興銀行開咗個活期戶口，特別用嚟搞學生資助嘅。嗰時開呢個戶口只需畀10蚊，好抵，所以好多同學仔都有開。但呢個戶口無得申請學生信用卡，投資戶口又無優惠，所以唔多用。

仲有一個花旗綜合加投資戶口，專用嚟買股票！本來只係想要個股票戶口，點知一定要有綜合戶口先開得投資戶口，所以惟有開埋。用嚟做出糧戶口有得免手續費，都唔錯。」

●公開大學商業管理系學生Catherine - 中銀、滙豐

「入U時開咗中銀嘅儲蓄戶口，因爲間銀行就喺U嘅樓下，好方便，同埋嗰時銀行有做信用卡Promo，所以咪開埋平時用。

滙豐戶口都有，係好多年前Daddy、Mommy幫我開落，做出糧戶口同埋搞學生資助。因為滙豐同恒生櫃員機通用，所以習慣喺呢個Account攞錢。」

●浸大投資學會主席Monita - 中行與建行(內地用)、恒生(香港用)

「喺內地用開中國銀行、建設銀行戶口；舊年9月來港升學，就開咗個恒生存款戶口，仲申請埋恒生信用卡，因為恒生分行較近我，方便，兼且朋友都喺嗰度開。」

─ ─ ─ ─ ─ ─ ─ ─ ─ ─

又到交稅季節，點先可以輕輕鬆鬆，安享悠閒「稅」月？想要着數即刻入嚟睇http://bit.ly/20ToU3P

on.cc東網