m18講場：御藥堂靠沙士起家　賣板藍根發達

御藥堂(00932)原來係靠當年沙士賣板藍根發達嘅！主席陳恩德(Mark)話，公司係由依家80幾歲嘅爸爸同妹妹喺2002年開嘅，當時佢都做同行，因為仲算係學緊野嘅階段，所以就未返公司幫手。佢話當時公司規模好細，投資幾十萬開設嘅。

直至到2003年沙士，初期傳聞話板藍根可以醫到，所以當時公司嘅板藍根貨去得好快，要24小時搵貨源畀連鎖零售商，忙到要喺公司瞓。雖然最後證實板藍根對付唔到沙士，不過都令佢哋做咗好多生意，令規模變大。

公司今日由創業板轉至主板上市，當中唔涉及集資。Mark話主板Stock Code「00932」係「搞生意」咁解，係自己揀嘅，以前創業板「08185」個Number就係抽嘅。轉板後對佢黎講冇乜特別，都一樣繼續「搞生意」！

公司送咗放大N倍嘅冬蟲草紀念品畀港交所(00388)，Mark話果陣喺創業板上市嘅時候都係送「冬蟲草」，話冬蟲草最代表到公司。好似無新意咗啲喎，佢就解釋，話當時送蝙蝠蛾科幼蟲「進化中」未完成嘅冬蟲草，依家轉主板就送「進化完成」嘅冬蟲草。又幾好橋喎！

至於公司另一隻解便產品就係代言人之一藝人米雪介紹佢用，Mark話用過覺得好，就向馬來西亞廠溝通再改良成依家嘅產品。佢話，米雪喺內地拍攝緊，所以嚟唔到撐場。而同樣係代言人嘅藝人陳豪同「三哥」苗僑偉就黎咗。陳豪話，佢媽咪係中醫，自己對中醫都有「皮毛基礎」，好開心見到公司愈做愈好。「三哥」就話，見到公司轉主板好有成功感。

─ ─ ─ ─ ─ ─ ─ ─ ─ ─ ─ ─

又到交稅季節，點先可以輕輕鬆鬆，安享悠閒「稅」月？想要着數即刻入嚟睇http://bit.ly/20ToU3P