東網電視
更多新聞短片
喺職場上，真係咩人都有、各有各諗法。公司裏面有人唔妥自己，又或者睇好自己，有幾出奇？返工講到底都係「搵食啫」，咩都係其次。不過，若然唔妥你，又或者睇好你嗰個係你上司，咁就大件事喇。上司要保持專業，更加會將啲感情盡量收埋，但人始終係人，總有啲蛛絲馬迹唔覺意會睇到。
嗱，今次先嚟個「上集」！以下20個蛛絲馬迹，上司唔妥你。中少過5個項，都仲可以當係自己「諗多咗」；中多過５項就...你懂的。
─ ─ ─ ─ ─ ─ ─ ─ ─ ─ ─ ─
1、直覺唔多妥
嗱，直覺呢家嘢，真係唔好唔信呀！如果直覺覺得上司唔多妥你，對你零舍唔同(係零舍差嗰隻)唔好懷疑，即刻去搵證據。
2、商量冇你份
上司決定啲關你事嘅大單嘢之前，冇搵你商量、冇問你意見，意味住佢唔信任你。
3、零眼神接觸
眼神好難講大話，上司避免同你有眼神接觸，就係費事等你知佢唔like你，要保持專業嘛。
4、對你無表情
一見你喺度，上司即刻蓄意收起笑容、板起塊面，呢樣真係唔使多解釋啦。
5、對你乜都管
對下屬巨細無遺乜都管，可能係上司本身危機感重，但亦有可能係佢對你失晒信心。
6、處處避開你
上司見你等電梯，佢就寧願行樓梯，連工作日程都專登編到可以「見你唔到」。
7、招呼零反應
每朝你返工同上司講早晨、放工講拜拜，佢都零反應，當你冇到。
8、一句兩句止
同你講嘢零舍簡短，一句起兩句止，甚至得聲「OK」或「嗯」。
9、繞手反白眼
一對住你，上司就繞晒手、反白眼；你搵佢時，佢頭也不抬繼續望住個電腦；身體語言通常係最老實嘅。
10、零正面溝通
上司交代你要做啲咩，都只係經Email或者WhatsApp，莫講話面對面溝通，連電話都費事同你傾。
11、道門閂到「冚」
你上司若果坐Office，但佢房門長期閂到「冚」，咁可能代表佢唔想同你有任何交流。當然，亦可能係佢本身都好自閉吓啦。
12、乜都唔啱聽
你掟咩橋出嚟，上司都Ban；你提咩意見，佢都唔啱聽；但隔離位講差唔多嘅嘢，佢又Buy喎。點解？唔使問啦。
13、同你齋公事
上司同你講公事好正常。不過，如果佢同其他人會傾埋屋企啲細路乜乜乜，而同你就齋公事，咁擺明係「零興趣」了解你囉。
14、齋畀濕碎嘢你做
上司專畀埋啲完全唔使帶腦嘅濕碎嘢你做？呢啲唔係叫體恤，而係唔尊重你嘅能力，甚至可能係想逼你走。
15、冇彈亦冇讚
無論你做成點，上司冇彈亦冇讚，零反應，咁意味住佢根本唔Care你做成點。當然，如果連埋第14點一齊諗，成個picture你就更加清楚啦。
16、當眾落你面
人要面樹要皮，佢對隔離位就「陣間入我房」，對你就公開處刑。好明顯啦。
17、唔同你講笑
可以同成班人一齊開玩笑，即當你係自己友；一對住你，上司啲爛Gag忽然唔見晒，咁就真係聞到味喇。
18、唔畀Credit你
無論你有幾勤力、點諗咗條絕世好橋出嚟，上司硬係唔畀Credit你，咁唔出奇；但若然佢只對你一個咁，你要自求多福喇。
19、唔使你跟嘢
你落咗成擔心機，上司一句「呢個Project唔使你跟喇」，仲唔止一次要你「中途停賽」，咁就真係...唉。
20、淨係燥你底
對住其他人就好有耐性，但對住你就Keep住燥底，咁即係點？你話呢。
─ ─ ─ ─ ─ ─ ─ ─ ─ ─ ─ ─
●得罪上司 要點化解？
大鑊！真係中多個5項？合眾人事顧問有限公司總經理蘇偉忠話，比較緊張嘅僱傭關係喺香港唔出奇，多數都係因為達唔到上司嘅期望，又或者做嘢唔專心、辦公時間做私人嘢都好易令到上司有意見。
上司真係唔妥自己，咁點算？遇到呢啲問題，蘇偉忠話最緊要就係「攤出嚟講」，要知道大家想點，「唔好估估下」。如果講唔掂數，就「好似男女朋友咁，大家接受唔到就唯有分手」。
不過，蘇偉忠就提醒打工仔「唔好太理想化」，尤其係啱啱出嚟做嘢嘅後生仔，「你嘅Dream Job」可能同現實唔同。如果真係要走，走之前最緊要衡量吓，「唔擔保第二間公司冇相同情況」，因為「辦公室政治喺好多公司都會存在」，要諗清楚。
─ ─ ─ ─ ─ ─ ─ ─ ─ ─ ─ ─
想領悟更多理財智慧，富足一世？即刻click入「致富智庫」
「東網Money18」fb專頁：有討論、有分析，齊來FUN享，贏盡●你Like
