孖妹S檔案:分清牛熊市真偽 唔使靠估

20160328
東網電視
更多新聞短片
喺股場打滾嘅孖妹梗係鍾意牛市啦,但最怕就係遇到隻披住牛皮嘅熊,被佢呃到嘅話,隨時血本無歸。港股由2月嘅低位明顯反彈,暫企穩20,000點樓上,但專家對後市睇法有好大分歧。到底之後會見到披住熊皮嘅牛,抑或披住牛皮嘅熊?孖妹如果有預知能力就好啦,不過專家嘅「預知能力」又係點培養嘅呢?
林:資深財經人士 林一鳴(Eddie)
彩兒:上年4月「港股大時代」期間,人人炒股炒到興高采烈,憧憬恒指上30,000點,你就斷言港股踏入咗熊市,結果之後港股真係大跌。你近期嚟個華麗轉身,由淡友變好友,話港股已開始進入牛市,仲叫大家儲定子彈等入貨,搞到原本對炒股心如止水嘅我,又再蠢蠢欲動。
Kitty:不過穆迪最近降低咗香港評級展望至負面,大摩又出報告,預測恒指今年最差見14,080點,城中富豪更話香港經濟今年會係20年來最差。究竟係牛市定熊市呀?我好亂呀!
林:啲人睇經濟、企業盈利去估個市升定跌,但個市升跌好多時係受群眾心理影響,呢樣嘢會影響資金流向。好多時股市會行先經濟半年至1年,甚至直頭唔同步。
彩兒:係喎,你鑽研波浪理論咁多年,港股開始進入牛市呢個預測,唔通係數浪數出嚟嘅?
林:去年4月27日恒指上到28,588點,嗰個係近呢幾年股市頂位,中間經過A、B、C三個唔同跌浪,到今年2月12日最低跌過落18,278點,期間累跌約10,000點。18,278點應該係C浪嘅底,完咗C浪會返牛市周期。牛市分牛一、牛二、牛三呢三個階段,牛一嘅時候,經濟通常都係好差,比如03年4月,嗰時爆發緊沙士,滙控(00005)跌到落33蚊,所有經濟數據都唔好,但其實已經係牛市開端。呢個階段多數投資者都係睇淡後市,正如今日冇咩人會預期恒指可以升過25,000點,估升過22,000點嘅人都唔係好見有;由於大部分人睇淡,持股量偏少,所以個市較難再跌落去,大家都冇貨,仲有邊個沽?反而呢個時候有少少人買返,個市就容易升返上去。
Kitty:咁港股之後嘅走勢會係點?
林:牛市一期會有一浪升、二浪跌嘅模式。之前熊市ABC浪,港股由28,588點(15年4月27日)跌落22,836點(15年7月8日),再彈返一次,啱啱約係跌幅嘅一半,上返25,634點(15年7月21日),跟住再跌落18,278點,呢次嘅跌幅係7,356點。基本上,今次牛一嘅升幅會參考返對上一次C浪嘅跌幅,終點嘅可能性有3個,包括係21,088點(7,356 × 0.382 + 18,278)、21,956點(7,356 × 0.5 + 18,278)同埋22,824點(7,356 × 0.618 + 18,278)。恒指下一個阻力位會喺21,088點,睇吓呢個位過唔過,唔過就會落返晒去,但就應該唔會跌穿18,278點,過到嘅話,再睇第二級21,956點,再升穿就睇22,824點。(恒指上周四收報20,345點)
彩兒:睇睇吓有啲暈浪添,我都係覺得有番啲基本因素支持安心啲。
林:中國放寬咗貨幣政策,市場資金多咗,股市自然會好,A股由高位跌咗近半,再大跌嘅機會唔大,加上我估計美國今年只會加一次息,甚至唔加,比市場預期嘅次數少。
Kitty:依家個市唔上唔落咁,幾時入市好?
林:恒指去到近20,000點嗰啲位就可以開始買貨,驚嘅話買住一半先,去到啲阻力位可以減返磅,見到佢升穿個阻力位又加番。完咗呢個升浪會有個回調,落返去二浪,之後大部分人嘅情緒會轉好。到確定大市進入牛市第二期,就可以瞓身買入去,依家就邊買邊睇。
彩兒:諗起係時候重返股場,咁買咩好呀?
林:可以盡量睇返啲受惠貨幣政策寬鬆嘅板塊,內房、基建行業今年應該會做好。建行(00939)、工行(01398)同中行(03988)呢幾隻內銀都可以考慮,佢哋依家得4、5倍PE(市盈率),息率有7至8厘,有防守性,同埋佢哋都係國企,倒閉機會基本上係零。另外,當油價回落番去近30蚊,都可以買番啲中石油(00857)。今年股、金、匯、油當中,我比較睇好中港股市。
周:瑞士寶盛私人銀行中國及香港高級證券分析師 周雯玲
彩兒:港股由2月中18,278點,升返上20,000點樓上,究竟有咩利好因素帶動呀?
周:香港個市暫時跟外圍環境走,近期油價、人民幣都穩定咗,歐央行又公布咗議息結果,話唔會再加大負利率,但會繼續做量化寬鬆,同埋聯儲局議息後維持利率不變,過去一段時間有好多穩定信心嘅消息出咗嚟,令市場風險胃納提高咗,所以你見個市喺2月中開始上升,問題係嚟到呢個位個市點走。
Kitty:你知啦,我哋呢啲散戶,永遠都係後知後覺,2月中冇捕捉到個低位入市,咁既然外圍環境穩定,我係咪依家應該追入?
周:市場信心係恢愎咗,但如果突然有咩事發生,信心冇咗嘅話,大家又會好快謹慎番。反而,我覺得個市升咗咁多,大家要睇位,恒指由2月中到依家都升咗十幾個百分點,大家要衡量下自己嘅風險承受能力。實力股唔怕揸,但依家係咪要跳入股市去買呢?我覺得要自己衡量,依家個市已經有阻力。
彩兒:聽你咁講,即係依家唔多似係牛市?
周:你見到啲風險資產同商品都有回升,新興市場貨幣亦升咗,高息債同零風險債券之間嘅息差都回調咗好多,你睇得出啲人係願意承擔較高風險去換取較高回報,但信心唔係好足。睇返港股個市嘅成交量唔係好多,啲經濟數據又咁弱,大牛市嘅表現完全唔會係咁,冇可能踏入咗牛市。依家市場參與度唔高,有起咩事上嚟,啲人好快會獲利套現。
Kitty:之不過港股依家得嗰8、9倍PE,唔抵買咩?
周:港股嘅PE咁低,係因為被好多內銀股拖低咗,其實唔計內銀股,恒指PE都唔係話咁平。投資者買內銀係因為息高,但派息可以減㗎嘛,呢個係一個風險,發生嘅話會影響股價。我一向建議客人買啲好穩陣嘅股份,睇重管理層質素、業績、現金流同埋派息係咪穩定,咩時候買呢啲公司都冇問題嘅。
彩兒:你話港股受外圍市況影響,嚟緊聯儲局如果真係加息,個市會唔會又再震過㗎?
周:依家市場嘅共識係今年美國會加多兩次息,聯儲局之前一路將息口減落嚟,當經濟好轉,係要將利率周期正常化,令未來經濟有咩問題,都有空間再減。睇番聯儲局嘅決策,佢唔會閉門造車,上年8月人民幣有個好大嘅波幅,都影響咗美國加息步伐。聯儲局會考慮外圍環境,以及自己嘅經濟。大家將美國今年加多兩次息嘅預期反映咗喺資產價格上,假如結果同呢個共識有出入,就會令市場出現震盪。
─ ─ ─ ─ ─ ─ ─ ─ ─ ─ ─ ─
「東網Money18」fb專頁:有討論、有分析,齊來FUN享,贏盡●你Like