睇樓逐呎度：傲雲峰30呎露台認真爽

東網電視

傲雲峰2房戶開則偏大。

香港唔少人鍾意屋企有露台，事關可以令到大廳光猛通爽咗，同時又多嗰地方放雜物、種盆栽、曬衫等等，最重要唔係「一個人的露台」，一啲都唔Lonely。今次同大家逐呎度嘅土瓜灣傲雲峰單位，露台夠寬敞，簡直無得輸！不過，萬一打8號風球兼黑雨就好麻煩喇，去唔切水的話，分分鐘嗰露台一夜之間變咗「澤國」。

今次帶大家參觀土瓜灣大型屋苑傲雲峰2房戶，實用面積539方呎，實用率唔算高，只有約75%。經過玄關就去到單位大廳，面積超過150方呎，長近16呎，擺放家具無難度！

值得一讚嘅係，大廳連接約30方呎露台，地方寬敞之餘，又可迎進充足光線，最重要唔係「一個人的露台」，一家大細排排企都仲得。但臨近7、8月打風季節，8號風球殺到嚟，嗰露台分分鐘變咗「澤國」，垃圾又通地係，要清理都咪話唔慘慘豬！

至於主人房和細房，分別有83方呎及47方呎，兩者都有頗大嘅對比。細房地方淺窄，放置大件家具後地方都有困難，往往要訂造才啱位。

廚房有逾50方呎，放置廚櫃後活動空間充裕。單位嘅缺點係有8呎走廊及逾6呎嘅玄關，睡房窗台位亦都闊近2呎，拖低全屋嘅實用性。

土瓜灣受惠於沙中線嘅鐵路系統興建，未來升值潛力及交通配套更見優越。坐落宋皇臺道的傲雲峰，係區內指標屋苑，入伙逾10年，保養簇新，係大多用家心水之選。

由於屋苑外形簇新，與周邊舊樓林立嘅環境形成對比，加上傲雲峰伙數眾多，設大型會所，深受用家追捧。屋苑嘅2房戶開則偏大，部分「大2房戶」實用面積都有500餘方呎，空間闊落夠使。

美聯助理聯席董事林智明稱，傲雲峰2房單位盤源充足，現時有約30個買賣放盤，二手叫價徘徊600餘萬元至700餘萬元，降價幅度較大，一般較高峰位下調約10至15%。

─ ─ ─ ─ ─ ─ ─ ─ ─ ─ ─ ─

其他精彩新聞：即睇！5招幫你Keep到晏晝都有能量

「致富智庫」領悟理財/職場智慧，一Click改變一世

on.cc東網