大學生開信用卡︰注意5大事項！畀埋4大貼士
20160818
東網電視
更多新聞短片
聯招放咗榜，暑假又過咗一半，各位準大學生依家係咪準備緊O Camp同申請緊住Hall？其實仲有樣嘢要注意，就係你嚟緊好大機會會開人生第1張信用卡喇！每逢開學前後，大學校園都有唔同銀行擺Booth招攬客仔Sell吓信用卡，好多時又強調送迎新禮品。不過咁多選擇，究竟點揀好？而各位準大學生，用信用卡之前應注意5大事項！
----------------------
各位準大學生申請信用卡，記得要學識點用卡，千祈唔好未畢業就欠落一身債，先睇睇有咩注意事項：
●只免頭1年年費點好？
唔好太擔心，若喺出卡後年內恆常有簽帳，通常銀行都會豁免年費，不過記得要同銀行申請！
●攞完迎新Cut唔Cut卡好？
攞完迎新禮品就想拍拍籮柚Cut卡閃人？你太年輕了！唔同銀行可能會就取消信用卡戶口收取「懲罰」，例如恒生就寫明，如客戶於開戶後13個月內取消信用卡戶口並已獲贈優惠，須繳付50港元作手續費，意味要嘔番之前收取得等值優惠出嚟！同學仔申請同Cut卡前記得睇清楚條款！
●睇清楚係咪免理財戶口月費！
好多時申請信用卡個陣，銀行職員都會建議同學仔順便開埋個理財戶口方便找卡數，呢個時候記得睇清楚理財戶口係咪免埋月費！又以恒生為例，寫明同學仔在學期間可獲豁免綜合戶口月費，但畢業後就只能豁免頭3年月費，之後就要按當時持有嘅綜合戶口收費計算番。
●大學生信用額夠唔夠使？
一般而言，大學生嘅信用卡額度係10,000元，同學仔除非有入息證明，否則銀行都唔會加大額度。同學仔仲讀緊書，不妨忍忍手，使少啲！
●記得準時找卡數！
記得準時找卡數！記得準時找卡數！記得準時找卡數！因為好重要，所以要講3次！要知道，拖欠卡數會影響個人信貸紀錄，可能對將來求職或申請貸款有負面影響！好似部分職業如紀律部隊、金融監管機構、銀行等，篩選應徵者個陣可能要審核信貸紀錄，所以千祈唔好睇少準時還錢嘅重要性。而且信用卡嘅結欠年息往往係30厘以上！唔準時還錢，利息支出相當「喇利」，同學仔，謹記準時找卡數！
----------------
咁揀邊張卡先至好呢？
●想要50蚊Cash？恒生聯營卡！
唔好講咁多，現金回贈最實際？咁可以考慮恒生聯營卡！因為迎新禮品就係送你50元cash dollors，直接當錢使！呢張卡仲有個比較特別嘅地方，就係會因應唔同院校推出獨有特別優惠，同學仔可享受同學校相關嘅回贈同Discount！
適用同學：城大、浸大、中大、中大專業進修學院、恒管
迎新禮品：$50cash dollors
攞迎新注意事項：須於發卡後60日內憑卡簽帳1次（冇金額限制）
回贈比率：簽帳每滿250元 = 1元Cash Dollar
年費：永久免年費
推廣期：至2016年12月31日
●任何人都可以申請？星展COMPASS VISA！
星展COMPASS VISA大專生信用卡嘅特色，就係冇同指定大專院校聯營，換言之所有大專同大學生都可以申請得！攞呢張卡6張MCL電影禮券迎新禮品嘅要求都唔算太高，只要簽帳滿1,800元；但要注意，年費只係免頭1年咋！
適用同學：本地大專/大學生
迎新禮品：6張MCL電影禮券/飛利浦快思邏輯迷你電飯煲
攞迎新注意事項：須於發卡後3個月內簽帳滿1,800元/6,800元
回贈比率：簽帳每滿250元 = $1 COMPASS Dollar（等於1港元）
指定商戶簽帳每滿250元 = $2.5 COMPASS Dollar
年費：豁免首年年費（其後年費300元）
推廣期：至2016年9月30日
●成日網購？花旗Citi Clear Student Card！
好多年輕人都鍾意網購，如果你都係其中一份子，可以考慮花旗Citi Clear Student Card！因為網上外幣簽帳有2%現金回贈，其他簽帳都有0.4%現金回贈。當然唔少得仲有戲院優惠，包括Citi Studio 4DX電影戲票9折，3D及2D電影戲票買1送1等。但要注意，年費都只係免頭1年！
適用同學：本地大專/大學生
迎新禮品：Cinema City朗豪坊換票證2張
攞迎新注意事項：須於發卡後首2個月內簽帳滿2,500元
回贈比率：網上外幣簽帳2%現金回贈，其他簽帳0.4%現金回贈
年費：豁免首年年費（其後年費300元）
推廣期：2016年8月31日
●要張卡有自己Style？建行eye信用卡！
建行eye信用卡嘅賣點係可以設計個人化相片，適合追求個人風格嘅年輕人；當然呢張卡都有提供優惠，憑卡喺網上消費有5倍積分獎賞！即日起至12月31日，如果同學仔同時開立銀行戶口，仲送你一個耳機。
適用同學：全日制大學生
攞迎新迎新禮品：網上申請有50元超市禮券＋百老匯院線換票證2張/200元現金回贈
注意事項：須於發卡後首3個月內簽帳滿2,500元
年費：永久免年費
推廣期：至2016年12月31日
─ ─ ─ ─ ─ ─ ─
「東網Money18」全新功能「板塊追蹤」，助你分析抓緊投資先機
「致富智庫」領悟理財/職場智慧，一Click改變一世