東網電視
更多新聞短片
1/9
實用300幾呎嘅2房單位，啲房間可以有幾大，相信大家都「心中有數」。如果唔夠闊落、不過夠光猛的話，至少空間感都好啲，唔會太侷促，彌補番房細細嘅不足。
好似今期《睇樓逐呎度》走訪粉嶺花都廣場嘅2房單位，主人房就設有兩邊特大窗戶，每邊窗長逾5呎，室內光線勁充足，仲好有溫室嗰種玻璃屋feel。如果布置得宜，直情係浪漫滿屋添！
今期《睇樓逐呎度》帶大家去到屋苑嘅6座低層D室，屬最細嘅2房戶型，實用面積僅370方呎。行入單位即為長形客飯廳，長逾13呎、闊逾12呎，加上無玄關同埋少走廊位嘅設計，空間見使實用，易於擺放家具。
以2房戶嚟講，主人房空間都算適中，面積約有67方呎，最大特色係兩邊皆設有大窗戶，令室內光猛開揚之餘，兼且通爽十足。不過，冬天一到，好多時兩邊窗一齊扯入冷風。好似呢幾日寒流到，扯起風上嚟，兩邊窗就算閂埋晒，都可能好寒㗎，所以話，真係有着有唔着。
至於客房面積與主人房相差唔遠，大約65方呎，另外廚房及浴室間隔四正，惟空間較為細小，尤其係浴室面積僅得30方呎，活動空間較小。
美聯陳偉傑稱，粉嶺區屋苑盤源短缺，花都廣場現時2房戶放盤不足5個，加辣後普遍叫價硬淨，而唯一可睇樓嘅放盤就係今次走訪嘅單位，叫價425萬港元。
花都廣場位處百和路，係粉嶺指標大型屋苑，會所配套齊全，是區內上車熱點。雖然屋苑偏離港鐵站，約10分鐘步程才達，幸好附近有巴士總站，外出交通尚算方便。屋苑樓齡21年，10座物業提供約2,710個單位，勝在有大型住客會所，泳池、健身室及網球場等大路康樂配套應有盡有，行2步就可玩餐飽。
─ ─ ─ ─ ─ ─ ─ ─
又煩緊交稅？即刻click入「悠閒稅月」專頁
全方位追擊特朗普狂潮 即上「狂人入主白宮」專頁
香港樓市日日新鮮，話題多多，想睇晒最update樓市新聞短片，即刻click入http://bit.ly/1M2kP95
樓市乍熱，想睇更多一、二手樓精彩故事，即click以下連結：
新盤置啱睇
二手置啱Feel
花都廣場屋苑樓齡21年。
客房面積大約65方呎。
廚房間隔四正。
花都廣場最細嘅2房戶型，實用面積僅370方呎。
主人房兩邊皆設有大窗戶。
屋苑有大型住客會所，泳池、健身室及網球場等大路康樂配套。
長形客飯廳，長逾13呎、闊逾12呎。
浴室面積僅得30方呎，活動空間較小。
