睇樓逐呎度：都會軒「全屏幕」巨窗夠震撼
20170709
東網電視
更多新聞短片
依家智能手機流行「全屏幕」，勝在睇得更多。如果屋企大廳都有幅幾乎佔盡牆身位嘅巨型窗，又有乜好處先？一般嚟講，空氣通爽、景觀開揚等不在話下，其實更唔少得提高室內採光度，外望視覺效果夠震撼。今期《睇樓逐呎度》參觀紅磡都會軒嘅單位，廳房窗口位夠晒寬闊，尤其係大廳嘅「全屏幕」巨窗，闊近9呎，一室光猛之餘，空間感即時「升呢」！
呢個2房單位，實用面積476方呎，樓底高逾9呎。甫入單位為長形大廳，喺冇玄關及窗台嘅情況下，令超過172方呎嘅空間更加見使好用，擺放家具容易。飯廳設於大門口位，對正廚房，感覺歸一。
2個房間分別坐落廳堂兩邊，其中主人套房面積近70方呎，長逾9呎，房內預留空間放置衣櫃，地方闊落。客房地方較細，面積近59方呎。值得一提嘅係，大廳及其中一個房間設有佔牆身比例極大嘅巨型窗，室內分外光猛舒服。但較為失色嘅係，浴室不設窗戶，略嫌侷促，空氣亦欠流通。
迎富地產林穗華表示，上述走訪2房單位嘅同類放盤，以對正前面海韻軒嘅樓景單位最平，租盤及買賣盤入場價分別為2萬及750萬港元。至於享海景嘅2房租盤最平叫租2.3萬元，叫價800萬元。
都會軒落成14年，係綜合發展項目「國際都會」嘅住宅部分，坐擁完善交通網絡，旁為港鐵紅磡站，既貫通九龍至新界的東西兩鐵樞紐車站，更有直通火車穿梭內地多個城市，加上紅磡海底隧道近在咫尺，四圍去方便快捷。
屋苑由2座服務式住宅大廈組成，提供約662伙，基座為商場，生活配套齊全。屋苑佔約9成單位為1房開則，普遍預留空間可改作2房單位。
－－－－－－
香港樓市日日新鮮，話題多多，想睇晒最update樓市新聞短片，即刻click入http://bit.ly/1M2kP95
樓市乍熱，想睇更多一、二手樓精彩故事，即click以下連結：
新盤置啱睇
二手置啱Feel