東網電視
更多新聞短片
1/6
時下的新樓開則愈整愈細，要喺「蝸居」想辦法增加空間，向上拓展似乎係唯一方法，但大前提當然要屋企樓底夠高喇！今期《睇樓逐呎度》走訪咗西灣河柏匯嘅單位，就好似專登準備好畀你向高空發展咁，單位細細，樓底高逾10呎，隨時整張三層式碌架床都得，真係「化腐朽為神奇」囉！
呢個單位實用面積328方呎，房間設有兩邊闊窗，配合逾10呎高樓底，室內光猛舒服。單位開則有酒店風格，門口有逾25方呎玄關位，亦係開放式廚房所在，有足夠空間備餐，而且預留雪櫃位，設計相當貼心，迎合單身或二人家庭需要。
廚房旁嘅廳堂地方唔算闊落，長逾12.6呎、闊逾9呎，面積只有115方呎，但勝在間隔四正，而且有牆位放置家具，易於擺位。廳堂外連小露台，加上旁有落地闊窗，採光度十足，惟有逾8呎長矮窗台，實際用途不大。
至於房間及浴室平排開則，最特別係浴室有兩道門，分別通往房間及廳堂，鎖上連接廳堂嘅房門後，隨即變成套房，設計幾有心思。房間面積唔算大，面積僅55方呎，放置大床後活動空間唔算多，需要利用逾10呎高樓底特點，儲物空間向高空發展。而房內兩邊有大玻璃窗戶，窗位合共長逾15呎，感覺開揚舒服。
中原陳凱超表示，柏匯坐落成安街，鄰近港鐵西灣河站及筲箕灣道，生活便利，加上設有小型會所，吸引收入較高嘅年輕上班族租住，上月錄得逾30宗成交，其中一房單位租價介乎1.7萬餘至1.8萬港元。他續說，由於租盤充裕，有個別心急業主減租求客，以一房單位為例，7月底仍叫租2萬元，新近減至1.8萬元。
─ ─ ─ ─ ─ ─
東網已全面支援360影片及相片，讓你全方位睇盡新聞大事，恍如置身現場，立即登入東網360專頁：http://on.cc/360vr/
香港樓市日日新鮮，話題多多，想睇晒最update樓市新聞短片，即刻click入http://bit.ly/1M2kP95
樓市乍熱，想睇更多一、二手樓精彩故事，即click以下連結：
新盤置啱睇
二手置啱Feel
