孖妹S檔案︰半新股粉絲 數盡心中之最
20181202
東網電視
更多新聞短片
已上市一段日子嘅股份仍睇唔透？呢類半新股有無「錢」途？孖妹翻查年內上市嘅新股，數目已超越2017年全年。事實上，11月上市嘅新股表現唔差，升多跌少，例如近日上市嘅同程藝龍(00780)已累升逾一成。不過喺淡市成交少嘅日子，我哋依然要做足功課備戰，所以召集一班新股粉絲揀出今年半新股之最，一齊分析吓。
張：炒股達人 張匯川
Jackie：散戶 Jackie
余：余礎安會計師事務所董事總經理 余礎安(Roger)
聶：富途證券分析員 聶振邦
●最眼冤：海底撈四大原因撈唔過
Kitty：正所謂唔熟唔食，有冇啲半新股係我識㗎？
彩兒：你剩係識食飯同瞓覺，好難同你啱Channel。
余：今年有三隻平民化新股上市，但估計表現麻麻！海底撈(06862)唔好撈！因我覺得佢會陰啲陰啲跌穿10元。雖然佢係內地著名連鎖火鍋店，但有幾個不利因素。第一，估值貴；第二，成本貴，餐飲業有先天不足，需要多地方同多員工，而佢哋喺香港租舖就要捱貴租，加上兩地人工都唔平，所以百上加斤；第三，客人忠誠度低，打邊爐唔係家常便飯，唔可以餐餐食，而客人幫襯火鍋店，通常鍾意去新舖頭，試新湯底及新材料；第四，開火鍋店入場門檻低，易有競爭對手，要搶佔更多市場份額一啲都唔易。
Jackie：同意，海底撈進軍香港，要捱貴租之餘，打邊爐翻桌率亦慢，所以盈利能力低。
余：另外，唔少人睇好歐化(01711)，但其實佢嘅品牌唔夠潮，其產品市場亦太細，主要銷售中高檔歐洲進口傢俬，要針對中高端客戶群做宣傳有一定難度。再者，同行線上線下競爭激烈，有大眾化嘅老傢俬品牌不斷變革，塑造時尚形象。歐化上半年收入按年減少，同時銷售及分銷開支增加，所以蝕多咗。
彩兒：歐化目前股價較招股價跌逾四成。
余：相信你哋都係好學寶寶，認識經營香港補習社「遵理」嘅精英匯集團(01775)，但佢都麻麻。雖然佢係中學補習社龍頭，但呢個市場已飽和，而公司收入過分依賴中學補習，故料業務增長有限。再者，會考及高考合併成文憑試多年，香港出生率亦持續下跌，同時外國升學普及，補習人數料大減。截至2018年7月底止全年業績，收入按年增加，但導師服務費亦大增，所以最終都賺少咗。
余：若公司拓展至幼兒教育，可能有轉機，但目前困難重重。因幼兒教育中心要有地理優勢，家長一般會搵間就腳嘅中心，容易接送子女上學放學。另外，幼兒家長會想老師貼心跟進孩子嘅學業同成長，所以遵理大班教學及名師吸客嘅方法唔適用。
●最值博：奧邦及澳獅具反彈信號
Kitty：公司條件好，梗係多人追。
聶：未必。倘管理層知道公司掂，上市定價都會高，投資風險就大咗。例如寶寶樹集團(01761)上市前獲三批融資，融資成本價分別逾3元、4元及11元，而招股價則為6.8元，屬偏貴。一旦公司上市後無咩新業務增長點，股價就難炒上。
彩兒：Let bygones be bygones.(過去嘅就由佢過去。)
聶：睇幅度，不如睇技術走勢。例如奧邦建築(01615)及澳獅環球(01540)，兩個走勢圖都出現弧形底，股價可望反彈。咁啱佢哋亦係毫子股，而毫子股表現通常好啲，我亦睇好富匯建築控股(01034)，股價上市至今升約1.5倍。另外，計埋每股合理值，若其高過招股價，都係值博嘅Signal。
彩兒：揀半新股，有冇關佢做咩業務事？
Jackie：我覺得做實業嘅最實淨，例如天仁茗茶香港經銷商賓仕國際(01705)，佢哋人流多，賺到錢。盈利能力弱嘅公司就唔睇好，佢哋全靠不斷融資，市值先符合上市條件。除非係好Hit，例如雷蛇(01337)，我都有抽，仲即日食胡賺幾百元。另外我睇好有明星效應嘅公司，例如騰訊概念股閱文集團(00772)及同程藝龍。
彩兒：Roger，你最叻睇公司年報，有冇邊間公司得你歡心？
余：碧桂園服務(06098)！睇返2018年上半年業績，收入按年升逾四成，期內利潤及綜合收益總額都升超過一倍。因過去呢一兩年內房銷售強勁，碧桂園亦然，而後續物管服務需求殷切，公司係內房龍頭，自己起好物業，可攞番物業管理嚟做。另外，唔係間間地產發展商旗下都有物業管理公司，所以佢哋唔排除會畀埋碧桂園做管理。其服務都幾全面，包括保安、開荒清潔及維修保養等；物業管理組合亦涵蓋寫字樓、醫院、公園及學校等。
Kitty：內地醫藥界第一隻獨角獸藥明康德(02359)快上市，唔知到時會否超額認購、股價爆升？
彩兒：藥明康德(603259.SH)5月喺上交所上市後，連續16日漲停，曾累升逾5倍。但目前A股股價同港股招股價上限都接近，所以博在香港上市後狂升，我冇咩把握。
●最無望：受累二手市 普遍難復返
張：我估計今年好多半新股都一去不復返，因連二手市場股價都低殘，仲邊有人炒新股，莊家超難散貨。例如同程藝龍，其買賣盤唔多。唉！後悔點解喺新股狂熱時，唔買多啲。
彩兒：
個別情況咋？希瑪眼科(03309)上市至今升近一倍；賓仕國際首日上市升近三倍。
張：升過一下，莊家成功喺高位散貨，就唔再炒喇。如果仲揸住，真係有排蟹。同2017年比較，真係好大分別。上年尾都話有閱文及眾安在綫(06060)，佢哋升跌盤路都明顯，所以多散戶追捧，一日可賺逾十萬元。嗰時股價不斷升，散戶都冇有怕不斷追，莊家亦唔介意推高價，所以掃上去好順。
Kitty：唔炒半新股，抽新股又如何？
張：第一，睇有冇明星效應。若相關報道鋪天蓋地，個個散戶抽，股份爛船都有三根釘。若報道係零，公司上市冇人知，股價都好難升；第二，睇基本面。例如美團點評(03690)市值高，但業績蝕800幾億元人民幣，散戶都卻步；第三，睇港股成交額。二手市場炒旺完，先會順帶新股炒上。近日港股成交額1,000億元唔夠，舊股都無人問津，更何況新股？
Kitty：明年都係無望？
張：我覺得港股，包括半新股都有排衰！11月似乎升番少少，但都只係技術性反彈，我估恒指唔會升穿28,000點。料其後仲會迎接一個大跌市。今次股災唔好睇少，係罕有股樓齊冧，投資者要小心。我無揸半新股，亦唔打算炒住。
－－－－－－
●逾四十隻新股倍升 叻過舊年
彩兒：踏入12月喇，不如預早嚟個半新股Round-up先？
聶：今年上市後倍升股數目，截至上周三(11月28日)，有40多隻，超越上年數目。賓仕國際及希瑪都一度較上市價升逾六倍，所以我覺得淡市反而仲旺新股。
Kitty：我覺得當市況差時，上市嘅股份都差啲。
聶：咁你就錯喇。香港交易所(00388)設有新股最低上市門檻要求，若佢基本面差，一早就被剔出。另外，有問題嘅公司，多數係上市後先會走樣。
聶：截至上周三(11月28日)，今年低過上市價嘅新股有131隻，當中93隻低過兩成，31隻低過五成。另上市至今未浮過上水面，即股價未曾高過上市價嘅股份共有13隻。
彩兒：今年截至10月底新股上市數目高達185隻，已超越2017年全年的174隻。港交所行政總裁李小加預言，2019年香港新股市場都會好強勁啵！
張：我覺得，愈嚟愈少內企會嚟香港上市，因料港股炒唔起，籌集資金都少。
－－－－－－
《骰寶坊》誠邀各地【賭王】【賭后】挑戰神人境界，每日更有百萬籌碼等你領取！立即免費下載，體驗《骰寶坊》最真實、刺激的多人在線骰寶遊戲！
遊戲下載：
東網Money18「貼市貼士」功能，助你掌握投資先機