菜鳥級！5招如何「齋啪」模型而不失霸氣

講起男人嘅浪漫——砌高達，就會諗起高手們剪件、洗件、假組、夾件、上色等N咁多重工夫，閒閒地完成品「夜以繼日」都要幾個月先都搞得掂，對於單純想享受組裝過程樂趣嘅朋友嚟講，簡直係「地獄」！其實只需幾件架生加些少技巧，模型新手「齋啪」素組都可以炮製到一件呃得下人嘅成品㗎！

剪件留水口

砌模型第一步當然係照住說明書依次序剪件啦，不過徒手齋搣兼亂用指甲鉗好容易令切口參差不齊。其實一定要模型專用剪鉗，而且揀剪口愈鋒利愈薄款式，咁剪出嚟切口先會瑕疵愈細。另外剪件時一定要分兩次進行，先剪剩些少水口，然後才用鎅刀小心割走埋佢。甚至再簡單啲，將水口平面一方朝向自己，用剪鉗緊貼表面Cut走佢，咁切口傷痕就會比較小。

畫線添層次

素組高達一般有2個「魔法步驟」可以將成品化腐朽為神奇，先講第一樣「畫線」。其實模型組件表面布滿唔少刻線細節，唔加工純組合會覺得好單調，但如果組裝前先滲線，就會令組件變得更立體層次。對於畫線坊間有朋友會用琺瑯油處理，但今次建議簡單啲，一支灰色極細油性Gundam Marker畫線筆就可以走天涯喇！之所以唔揀黑色係因為淺色線條觀感上較順眼，就算畫出界手指頭一捽就無事。但要留意畫線時要注意力度，唔使來回畫「綑邊」令線條深色。此外對於處理深色組件上明顯水口，輕力用灰色畫線筆塗上些少仲可以起到若干遮瑕作用添。

剪裁貼紙好睇啲

模型都會附有一大張標記貼紙，但唔似得刮貼或者水轉印貼可以將圖案直接移印至部件上，一般膠製貼紙質地較厚身，貼上去見到貼紙四周礙眼嘅「框框」。所以上貼之前最好自己用鎅刀緊貼圖案再剪裁出嚟，令瑕疵愈細愈好。此外千祈唔好徒手搣貼紙，事關會留下指模相當醜怪，故此最好用郵票夾協助黏貼。

補色加舊化

雖然現今模型已採用多色成形鑄模，令部件本身已有齊所需顏色，不過細緻部分可能無法兼顧，常見例如眼睛、武器嘅瞄準器等細範圍表面。呢個時候可以用筆頭較粗兼有多種常見顏色嘅Gundam Marker直接塗裝。更進一步仲可以買埋舊化用水性Gundam Marker，或者Tamiya Weather Master粉盒略為擦上陰沉顏色，營造實戰污糟感覺，不過用之前最好搵啲廢棄部件試下手感。

噴消光扮上色

之前提過砌模型有2個「魔法步驟」可以將成品化腐朽為神奇，而家講埋第2個就係「噴消光漆」。簡單講就係響模型表面噴上一層透明而不光滑的漆膜，令成品睇起嚟無塑膠光澤感，效果就好似上色一樣！不過噴消光漆時記住以下幾個簡單技巧：

1）乾燥環境下使用，因為潮濕天氣容易令表面「白化」。

2）相距組件約20-30cm下噴灑。

3）每次順同一方向薄薄一層咁噴，唔夠可等乾透再反複噴灑，直至認為完全覆蓋表面為止。