拆解尿袋5大迷思

手機電池容量雖然愈來愈大，不過耗電量同樣驚人，唔想電話半日冇電冇得玩WhatsApp、Facebook，惟有乖乖哋帶個俗稱「尿袋」嘅外置充電器。市場上同類產品多到數唔晒，最令人混亂就係產品上嘅數字、英文，今次就等小記為大家拆解，齊齊做個精明消費者！

1：mAh充唔足？

mAh（milliampere-hour）其實係電池容量單位，數值愈大代表可提供電量愈多，不過外置電池體積亦會相對較大、較重，影響便攜度，如果諗住每日跟身的話就要注意。要留意是，以10,000mAh外置充電池為例，理論上可以為內置2,500mAh電池手機充電4次，不過因為電壓、電量轉換及運作過程，實際可用電量一般只會有標示電量的7成甚至更少。

2：充電速度唔夠快？

正所謂分秒必爭，充電時間當然愈快愈好，咁就要睇「Output/輸出」一項。外置充電池普遍都會標明其電流輸出或者Output，多數以mA或者A表示，例如800mA、0.5A、1A、2A，而1,000mA等於1A，所以上述電流輸出就以2A最高，理論上充電速度最快。注意電流輸出同時都要手機支援同等的電流輸入先得，唔知支援與否，不妨參考屋企個原裝火牛。

3：幾部手機一齊充電就慢好多？

而家好多外置充電器都設有多個USB插口，方便用家幾部裝置同時充電。不過要留意，單獨使用其中一個插口時，一般都可以提供最高電流輸出，但同幾個插口同時啟動時，電流輸出就有大可能被攤分，例如有產品提供兩個USB插口，獨立使用可提供2.4A電流輸出，但同時使用就只可以各自提供1.2A輸出，充電速度當然比獨立使用插口時大減。

4：「尿袋」充足一日都唔滿電？

幫手機充完電，當然都要為外置充電池「補給」！同樣道理，外置充電器都會列明Input/輸入，一樣會以大家外置充電mA、A兩組單位顯示，數值愈大就可以盡快「打滿」外置充電池拎出街備用。就以10,400mAh嘅小米行動電源官方規格為例，以2A充電時大概需要5.5小時，但如果呢款產品只支援1A甚至0.5A電流輸入時，充電時間當然倍增，梗係等到蚊都瞓啦！

5：快速充電、Quick Charge咩嚟㗎？

其實Quick Charge技術由流動處理器廠商Qualcomm推出，透過提升Volt（伏特）將電流輸出增加達至快速充電，但大前提係手機、火牛甚至外置充電池都要支援同樣技術先得，而iPhone因為唔係採用Qualcomm處理器，所以並唔支援，反而好多Android旗艦機都支援。支援Quick Charge技術嘅外置充電池市場上都唔算多，多數會印上「Qualcomm Quick Charge 2.0」、「QC 2.0」、「QC 3.0」等字眼或者官方閃電型圖示等。留意有產品並唔支援Quick Charge技術，但又標明「快速充電」，有誤導之嫌，認實喇！