東網電視
更多新聞短片
將會喺六月推出嘅Bandai《海底奇兵2》模型，主體連地台高約10cm，細細件易收藏。
1/8
邊個話只有宅男先會砌模型？風水佬呃你十年八年，我就人頭博竽頭預告，下個月會多咗女生都玩埋一份，點解？因為等足16年，《海底奇兵》（Finding Nemo）終於有續集，唔只今年七月有得睇，Bandai出手仲快，下個月就會推出《海底奇兵2》（Finding Dory）嘅得意模型，打頭陣就係兩大主角——多莉（Dory）及Mo仔（Nemo）。
咪以為砌模型一定要大陣仗，Bandai嘅《Finding Dory）就標榜超易砌，唔只毋須上色，就連剪鉗、砂紙都唔使，徒手就可以將組件拆落嚟，加上組件預先做晒分色，隨盒又有專用貼紙，輕輕鬆鬆幾分鐘就成事，點只女生，小朋友都好易上手。造型方面唔只神似，有晒動畫中嘅神髓外，魚鰭又可動，眼仔與面容各有三款配件，換言之，多莉與Mo仔各自可以變出九種表情，加埋專用地台方便Display。
好玩之處不只於此，Bandai同步仲會出埋高約11cm、長同闊各有15cm左右嘅海底場景，夠位放入多莉與Mo仔之餘，仲包埋珊瑚與背景紙板，將動畫中嘅場面活靈活現Show番出嚟，比3D電影更3D。咁好玩，會唔會好貴？多莉與Mo仔嘅建議零售價，各自都係1,000日圓，以七算計嘅話，到港應該賣HK$70；海底場景就賣HK$175左右（建議零售價2,500日圓），真心講，唔貴喎，求神拜佛到港之後唔會被炒貴啦！
圖片來源︰互聯網
多莉與Mo毛嘅魚鰭都有可動設計，增加玩味。
買得多莉與Mo仔，又點少得同步上架嘅海底場景Set，畀番個安樂窩佢哋嘛！
Bandai《Finding Dory》 海底場景 建議零售價︰2,500日圓（六月上架）
無論係多莉或Mo仔，各自有三款眼仔與面形組件，即係話可以變出九種表情。
Bandai《Finding Dory》 Dory 建議零售價︰1,000日圓（六月上架）
B記標榜組裝超容易，唔使上色，就連剪鉗、膠水都慳番，徒手就可以將組件拆落嚟。
Bandai《Finding Dory》 Nemo 建議零售價︰1,000日圓（六月上架）
