東網電視
更多新聞短片
特色炸物拼盤 HK$128：集合6款受歡迎小食，如炸芝士條、水牛雞翼、炸魷魚圈和較特別的炸粟米塊等，每款醬汁都有獨特配搭，相當講究。
1/11
四年一度嘅歐洲國家盃仲有幾日就開鑼，睇嚟又係約齊班Friend落吧撐心水球隊嘅時候。不過歐國盃分分鐘睇通頂，冇番啲高質素酒精同小食頂肚點得呀？小編就為大家搜羅咗九龍區觀塘、香港區中環同銅鑼灣3間氣氛一流、睇到夜一夜都得嘅運動酒吧，今次有得睇有得食，一於撐到盡！
觀塘The Stadium 無死角電視
位於九龍觀塘新活化工廈The Wave嘅酒吧餐廳，佔地面積約8,000平方呎，單係21部大電視無死角播放球賽就足夠令球迷們熱血沸騰。食物係主打分量取勝嘅美國菜，適合一班人Share，特別推介雲集6款小食嘅特色炸物拼盤同配料十足嘅甜番薯條，夠晒邪惡。另外仲有新出嘅精緻冷盤，好像無花果帕爾馬火腿、帕爾馬火腿棒等，選擇多多。中場休息冇嘢做，店內仲有足球機、桌球枱同飛鏢機畀大家玩番幾鋪。
中環Rude Bar & Lounge 內外有波睇
港島區中環Rude Bar & Lounge開揚嘅門口對正石板街，一到夜晚，特別係有球賽直播時，店內外都會聚滿人群，皆因不但室內有大電視同大螢幕播波，就連室外都設有大電視，果然係睇波湊熱鬧嘅好地方。睇波時間流流長，當然要食番啲滋味小食，喺度叫碟香辣蒜炸雞翼或者分量十足嘅炸魚薯條，開心Share啱晒。另外，之前酒吧會特別調製賽事主題雞尾酒，今次歐國盃期間亦唔例外，老闆話會有Special Shots，實際係咩就先賣個關子喎！但為咗普天同慶，酒吧由即日到7月15日，小食同酒類飲品都會以優惠價推出，大部分都減HK$20，聽落又幾吸引！
銅鑼灣Zerve & Zerve Plus Bar 開住P睇波
位於港島區銅鑼灣Zing!嘅Zerve，早前於4月擴張多一層樓，成為Zerve & Zerve Plus Bar，推出多款小食同添置咗10部大電視，兩層加埋可以容納近300人。食物方面，除咗推介主打嘅墨西哥酥餅（Quesadilla），配烤雞同洋葱松露薯條，淋滿牛油果醬（Guacamole）同酸忌廉，深夜時分食夠晒醒胃。此外，仲有薄餅、烤羊鞍、和牛漢堡、熱狗等主菜同小吃，唔同食量嘅球迷都滿足得到。飲品方面，酒吧提供超過40種特色雞尾酒，好似有爆炸糖元素嘅Amazing Journey，相當特別。現場仲有得玩投杯球（Beer Pong），亦係球迷們中場休息時間嘅一大娛樂。
甜薯條 HK$68：香甜的番薯條，上面加上3種芝士、松露蛋黃醬和煙肉碎，邪惡度十足。
Rude Special Shots HK$45/1杯、HK$240/6杯：酒吧會因應不同運動賽事特別調製飲品，像這次就用上Vodka、橙皮酒、青檸和藍柑橘酒調配，入口清甜帶勁度。
Quesadllias HK$88：主打小食墨西哥酥餅，配有烤雞和洋葱松露薯條，面頭沾滿牛油果醬和酸忌廉，滋味醒胃。
店內有香港較少有的投杯球（Beer Pong）玩，開Party一流。
無花果帕爾馬火腿 未定價：用意大利帕爾馬火腿，包住新鮮無花果和蒜蓉蛋黃醬，入口香甜濃郁，佐酒一流。
香辣蒜炸雞翼 HK$50（原價HK$70）：店舖招牌小食之一，以秘製香料醬汁醃製，味道層次豐富。
Purple Dream HK$98：由Gin、紫羅蘭香甜酒、玫瑰花茶、檸檬汁和糖漿調成，入口齒頰留香。
The Stadium佔地約8,000平方呎，兩台巨型大電視加埋計分牌，有埋坐無虛席的觀眾就夠晒現場感！
Rude Bar and Lounge佔地不廣，但勝在門口開揚，大螢幕播放球賽時即引來眾球迷聚於店內外，別有一番熱鬧景象。
Amazing Journey HK$108：以爆炸糖、Jack Daniel's、Aperol Liqueur和新鮮檸檬及橙調成，清香過癮。
