4招手機設限　子女免沉迷

又到暑假，小朋友唔使返學日日玩就梗係開心，但作為家長難免愁爆，最怕細路唔做功課掛住玩；特別係而家手機咁多嘢玩，匿埋唔出街都可以隨時上網、打機玩餐飽，點搞？今次就教各位家長幾招監控手機貼士，囝囡想沉迷手機都難呀！

Android一㩒即轉兒童模式

要唔畀小朋友沉迷手機，首要就係限制內容以及玩樂時間。而家好多Android手機好似Samsung、HTC、Asus其實已經內置兒童模式、孩童模式，家長們只要一㩒就可以自動進行一系列手機監控。就以Samsung Galaxy S7嘅「孩童模式」為例，進入後成個畫面都變得色彩繽紛，小朋友見到開心，家長就放心，皆因可以設定允許使用嘅聯絡人資料、應用程式，亦可訂立每日遊戲時間上限；而且仲有圖表記錄小朋友每日嘅遊戲時間、開啟過嘅應用程式等等，做過咩都走唔甩。最正係孩童模式無論開啟抑或關閉都需要使用密碼，㩒Home鍵、返回、重新開機都閂唔到，比起其他同類第三方App更加嚴謹。

iPhone、iPad：隱藏版「Kid Mode」

如果小朋友玩開嘅係iPhone、iPad，咁就可以試用呢個被稱為隱藏版孩童模式嘅「指導模式」。用家只要順序進入設定、一般、輔助使用，再將指導模式開啟就搞掂。用法簡單，開啟一隻畀小朋友玩得嘅App之後，之後連接三下Home鍵就可以開啟指導模式，開啟模式之後，用家就可以將實體按鍵包括Home、電源、音量停用，小朋友就只可以使用此App，唔驚佢玩到其他功能或者㩒錯掣彈出主頁。另外，用家亦可加入時間限制等選項，夠鐘就會將畫面停頓，郁都郁唔到。

網頁過濾要靠App

除咗驚小朋友亂玩Apps，另一擔心當然就係亂咁上網，呢層就要靠Apps做網頁過濾。就好似Android平台專用嘅《ESET Parental Control》，就內置「Web守門員」功能，可以攔截有害或不當網站，例如成人、惡意內容等等。實試以瀏覽器開啟香港賽馬會網頁，畫面就會即時顯示「此網站不適合我們」，小朋友自然冇得睇，但亦可以選擇「詢問你的父母」要求媽咪、爹哋瀏覽已封鎖嘅網頁！而iOS就更加方便，只要依次序進入設定、一般、功能限制、網站，即可設定《Safari》可以或不可以瀏覽的網頁，瀏覽指定以外的網址或受限內容時，《Safari》顯示「你無法瀏覽下列網頁：因為連線受到限制」，同樣有過濾功能。

《ESET Parental Control》

下載費用：免費（試用一個月）、HK$199（1人1授權）

遙距停機慳水慳力

你有你鬧，小朋友有佢繼續篤手機，講多無謂，停機最實際！推介大家安裝呢個Android、iOS都啱用嘅《Screen Time Parental Control》，首先喺家長、小朋友嘅手機上分別安裝呢個App，家長就可以實時睇到小朋友裝置嘅使用狀況，有冇開機、使用時間都一清二楚，最實用就係「Pause & Play」功能，家長可以遙控遙控暫停小朋友裝置上可使用嘅Apps，小記試過用兩部Android機實測，家長機只要選擇Pause時限之後，小朋友機表面上好似冇事，但無論㩒咩App、功能都會彈去同一個受限頁面，咩都用唔到，等同冇得用，小朋友實嗌慘！

下載費用：免費