全城玩具熱　必識5招保養珍藏

呢個禮拜尾又到年度宅男盛事亞洲玩具展「Toy Soul 2016」喇，相信唔少朋友已準備清空收藏櫃，方便擺放新嘅戰利品。執枱途中如果發現心頭好變殘舊，肯定無晒心機！而家就教大家5個保養方法，幫大家好好打理各種玩具，新入坑嘅玩家亦可學定，令珍藏歷久常新！

1 PVC公仔變黏封塵–梳打粉吸油除污

好多人都鍾意儲啲細細件PVC膠Figure擺設，但Display得耐就會滲油變得「黐立立」，容易黏上灰塵，用水清洗無法去除。其實呢個情況多數係公仔表面「塑化劑」釋出，令玩具黐塵。原來只要將少許梳打粉灑於微濕的絨布上，直接於玩具表面擦拭，便可捽走陳年油污和積塵，再用中性梘液過水，最後用廚房紙抹乾或直接風乾便可。梳打粉本身具吸油去漬功能，而粉末不會影響玩具表面，捽食玩最適合不過。

2 合金玩具怕生鏽–模型蠟水保護膜

合金玩具、聖衣神話、甚至是電鍍模型組件的表面，都容易因空氣、濕度和皮膚油脂而產生氧化，令表面變朦暗啞，摸上去手感粗糙，影響收藏價值。坊間雖然有教塗上光油作保護，但初學者容易塗至「一撻撻」。其實只需買一支雙星牌模型蠟水「Tamiya Modeling Wax」，劑些少到附上的乾抹布上，毋須濕水直接在合金玩具表面輕輕打圈，便會形成一層保護薄膜，待10-15秒後再輕抹，既可令玩具變光澤，又可防靜電兼防塵，一舉三得，但留意須隔2、3個月定期打蠟，方可保持狀態。再者把玩合金時，最好配戴手套以防皮膚油脂沾上玩具。

3 LEGO白件變黃–漂白水浸泡

玩LEGO最怕白件變黃，多數原因是被陽光或射燈等紫外光照射所致，因此長遠黎講，珍貴LEGO成品切勿被燈光照射。坊間雖然流傳用工業用雙氧水浸泡，據講漂白能力超絕，但會破壞LEGO表面保護，唔少朋友試完幾個月後白件有再次變黃問題。其實針對白件輕微變黃情況，其實可直接以洗衣用漂白水浸泡1-2天，再用清水洗走漂劑。但要切忌不宜將顏色積木件放置漂白水浸泡，會有甩色風險。

4 搪膠玩到鬆–換件吹風筒

經典造型的搪膠Figure近年越趨流行，但新手胡亂把玩容易「玩殘」公仔。其實搪膠換件時切忌強行拆除，應先以風筒令部件軟化，否則會扯鬆連接位。至於收藏玩家，切勿將搪膠公仔直立堆疊存放受壓，因為冷縮熱脹會導致玩具長短腳，建議橫放收納。再者潮濕天氣也令表面溶膠變黏，此時只需以洗潔精清理再風乾即可。

5 高達模型出斑–噴消光油入櫃

將素組完的高達模型直接展示，長時間擺放或會因潮濕而令模型表面黐塵，甚至發霉起斑，建議當砌好模型之後，在玩具表面平均噴上「Mr. Hobby Mr. Super Clear」消光噴漆，除了令模型表面變啞模擬上色效果，亦可當成保護防止表面積塵，再將成品放入有蓋展示櫃，以便保養。