色日放送：有村架純家姐　全裸拍寫真

潮語當中有句話叫做「成功靠父幹」，只要父親身家夠厚，作為子女就已經係成功人士喇！而喺日本藝能界，亦有靠父蔭或母蔭而成功嘅例子，最近更加有疑似靠妹妹而上位嘅例子添！寫真女郎新井優子正式改名為有村藍里，仲話會抱住覺悟以及背水一戰嘅決心進軍藝能界！

咪住！姓有村？唔通佢同人氣高企嘅24歲美少女偶像女星有村架純有關？大家估得冇錯！有村藍里正正就係有村架純嘅親生姐姐。而有村架純可以話係藝能界新貴，有佢演出嘅電視劇，八套當中有七套收視高達百分之二十，簡直就係電視台收視福將。

前年，新井優子乃有村架純姐姐嘅身份被有意曝光之後，已經有好多話優子撈極都唔紅想借妹妹嘅名氣上位喇！而藍里喺改名之餘，仲將會喺5月推出寫真集《有村藍里》，當中仲會作出幕前首次全裸演出！雖然所謂嘅全裸係三點不露，三點都有刻意遮住，但亦極盡官能刺激兼引起大家廣泛討論，加上優子剛剛正式改名為有村藍里就嚟一次咁激嘅演出，就令借妹上位嘅爭議聲進一步增強。而消息人士更指出，歷來亦有唔少類似例子，好似當年中森明菜嘅妹妹中森明穗走去拍火辣寫真，而有鑑於中森明菜所屬事務所對於明穗食住明菜嘅名氣上位嘅做法大感不滿，就令中森明菜受到唔少壓力，最後兩姊妹仲斷絕關係添！故有人估計有村藍里改名之後，好大機會為佢同有村架純嘅姊妹情，埋下斷絕關係嘅伏線！