東網電視
更多新聞短片
開箱男：Motorola Verve Cam+ 百變2.5K運動攝錄機
1/13
手機界風靡一時「Mo記」Motorola，近幾年不但加入耳機和家居設備行列，甚至踩過界出埋Action Cam，所指的是全新Motorola Verve Cam+，唔單止可以拍到2.5K的高質影片，仲有唔同配件畀你戴住上山下海，甚至係出街玩Snap、Selfie、Timelapse都冇問題。
市面上的主流Action Cam，例如GoPro、Nikon KeyMission 170的外形都係四四方方，之不過Verve Cam+就反其道而行，採用圓餅形設計，而且僅有61g淨重，方便隨身攜帶，但由於拎上手好難分上下左右，所以手持拍攝好容易令畫面水平傾斜。設計簡約的Verve Cam+，機面就用上了一支138度廣角鏡頭，影風景、自拍和第一身拍攝都合用，能夠拍到2.5k@30fps、1080p@60fps質素影像，至於兩邊就配備收音咪和喇叭，畀你記低和播放聲音。
Verve Cam+本身操作簡易，機身只有開關和拍攝兩個按鍵，所以大部分設定都要透過Wi-Fi和藍牙，連接《Hubble Connect for VerveCam》手機App控制。隻App唔單止可以做到影相、拍片，而且可以玩縮時攝影（Timelapse）、循環錄影，甚至乎做到串流直播，只要利用Wi-Fi或Hotspot，就可以利用YouTube進行實時直播。此外，App亦都備有13款濾鏡畀你為相片加工，亦能夠直接上載到Facebook、Twitter和Instagram等社交平台。
既然Verve Cam+作為Action Cam，就當然有唔同的配件，機體本身就支援IPX4防濺水，若然加裝防水殼（IP68防水防塵認證），就能夠帶住佢深潛達30米。除了防水殼之外，亦都有穿戴夾畀你夾在背囊或身上，大玩第一身拍攝效果；另外亦有三腳架外殼，能夠安裝在腳架上玩Timelapse，或者用自拍棍Selfie，甚至當車Cam用都冇問題；最後仲有橙色軟膠設計的「泵把」，配合埋頸繩，就可以掛住出街隨時Snap。
規格表
鏡頭角度：138度
影片規格：2.5k@30fps、1080p@60fps
電池容量：640mAh
體積：56×56×27mm
重量：61g
跟機附有四種配件，包括防水殼、穿戴夾、三腳架外殼和軟膠「泵把」。
三腳架外殼以便加裝到腳架上，並透過手機App《Hubble Connect for VerveCam》拍攝。
機頂上僅有開關和拍攝兩個按鍵，而且有影相、拍攝、直播圖案顯示當前使用模式。
機身支援IPX4防濺水，加裝外殼後防水效能提升至30米水深，就算去沙灘玩水、浮潛、水肺潛水都應付得到。
配件中有橙色軟膠設計的「泵把」，再用頸繩掛在頸上，隨時拎上手Snap。
穿戴夾的設計非常穩固，就算跑步都唔會飛脫，讓你全程記錄街景。
背面的USB接口用作充電，而電池續航力可連拍攝2.5K影像達45分鐘。
提供Timelapse玩法，拍攝後會自動生成影片。全部設定可以在手機App中操作。
三腳架外殼可安裝在自拍棍上大玩Selfie，而自拍棍需自備。
採用圓餅形設計，而且設有138度廣角鏡頭。
備有micro SD卡槽，最大兼容32GB容量。
透過Wi-Fi或者Hotspot，就能夠以App串流到YouTube進行直播。
