挑戰全世界！Gran Board Dash藍牙飛鏢靶

唔少人都會同三五知己落酒吧或飛鏢道場「掟鏢」Show Off，假如想偷偷地在家中「操鏢」都有辦法，皆因Zeta科卓引入了Gran Board Dash藍牙飛鏢靶，能夠透過藍牙連接《GranBoard》手機App，唔單只能夠同電腦練習，更可以同朋友對戰，甚至挑戰世界各地的網上飛鏢高手，邁向世界之巔。

Gran Board Dash規格跟大家平時玩的15.5吋飛鏢靶一樣，並有藍色和綠色版本選擇，只要兩粒AA電池就可以驅動，而且跟機附有兩組飛鏢，以及多個後備塑膠鏢頭替換。只要用藍牙配對手機App，就會提供多種飛鏢玩法畀大家，例如常見的「701」、「Cricket」等，亦可以設定「Double In」、「Double Out」遊戲條件，而且畫面亦會幫你自動計分，反應靈敏又準確。Gran Board Dash最好玩的地方當然係能夠線上對戰，既可同朋友互相切磋，亦可以跟世界各地的玩家挑機，提升自己的世界排名，為免在「掟鏢」過程中作弊，所以App能夠選擇啟用雙方的手機鏡頭，以實時直播形式睇到對手的現場情況，就算網上對戰一樣咁有氣氛。