是日本性：浸得銷魂　風俗泡泡浴

東網電視

更多新聞短片

是日本性：浸得銷魂風俗泡泡浴

1/8

如果屋企有個浴缸嘅話，冬天最好嘅活動相信莫過於喺屋企浸番個泡泡浴。不過日本亦有一種泡泡浴服務，只係大家咪以為真係浸浴咁簡單，查實佢係日本風俗服務嘅一種類型，而提供呢種服務嘅風俗孃更有特別名稱，就係叫「泡姬」。

泡泡浴＝土耳其浴？

其實以前日本風俗業中「泡泡浴」（ソープランド）並非用呢個名，而係叫做「土耳其浴」（トルコ風呂）。佢最初之所以有呢個名，又真係同源自土耳其地區，被稱為「土耳其浴」嘅蒸氣浴方式有關。話說歐洲傳統嘅土耳其浴場男士專區中，有男性搓浴師為男客人提供全身按摩、修鬚、修甲等服務，而部分招待外國男客嘅土耳其浴場，則換成女性浴師為男客人提供服務。日本人許斐氏利試過呢種獨特洗浴風味後，覺得引進入日本嘅話大有可為，於是喺1951年於銀座開設日本首間土耳其浴場「東京溫泉」，同時錯將女性浴師呢種做法保留落嚟。

正因為由女性侍浴關係，佢被風俗業睇中，將佢變成一種提供色情服務嘅另類土耳其浴，而呢個亦係點解泡泡浴場初會稱為土耳其浴嘅原因。由於佢嘅玩法特別，加上慢慢形成獨立房間服務關係，故此「土耳其浴」風俗店數量發展得相當快，從1953年全國90間，發展到1966年時有706間，而喺2008年時更係多達1,249間，成為一種主流嘅風俗類型。

改名風波

不過喺1983年一位喺東京大學留學嘅土耳其學生Nusret Sancakli，得悉日本嘅土耳其浴竟然係風俗服務嘅一種後，覺得侮辱咗自己國家嘅正宗土耳其浴，於是向日本厚生省提出改名訴求。隨住媒體大力報道，喺1984年10月「橫濱市特殊浴場協會」率先取消「土耳其浴」呢個名稱，神戶市及愛知縣嘅特殊浴場協會亦跟住取消，並以「特殊浴場」、「特浴」、「湯房」等作為過度名稱，而「東京都特殊浴場協會」則同期向民間徵集新名稱。同年12月19日「東京都特殊浴場協會」召開記者招待會，宣布從「浪漫浴」（ロマン風呂）、「浮世浴」（浮世風呂）等2,400個名稱中，選出以從英文「Soapland」音譯成嘅「ソープランド」（即泡泡浴）作為正式稱呼，而從事呢類風俗服務嘅風俗孃，亦從過往嘅「土耳其孃」（トルコ嬢），改名成「泡姬」或「Soap孃」（ソープ嬢）令呢次名稱風波告一段落。

泡泡浴有乜玩？

講咗咁耐泡泡浴，其實呢種風俗服務有乜玩呢？其實只要睇過日本AV中關於泡泡浴場嘅題材，都大概知道佢點玩。方法係風俗孃同玩家剝晒光豬，然後一齊洗白白，跟住讓對方瞓上水床，泡姬便會用沐浴露或潤滑劑搽勻玩家全身。不過搽嘅方法並非用手，而係用盡身體各個部位幫玩家搽，從而達到挑起對方情慾嘅目的。至於呢類風俗店嘅收費，則大體上可分為3個等級，分別係1萬至2萬日圓嘅激安系、3萬5千日圓嘅大眾系及7萬日圓以上嘅高級系，當然泡姬嘅質素及服務內容，跟價錢亦係成正比。另外，泡泡浴風俗店有兩項特色收費，分別係入浴料同服務料。前者即係入場費，係畀風俗店本身，而後者則係泡姬嘅服務費，由佢自己袋晒。正因為收入分開，部分泡姬會偷雞畀客人玩本番，只係僅為熟客提供。

老牌高級浴店

雖然現今日本有過千間泡泡浴風俗店，但講到老字號兼高人氣嘅話，便要數位於著名紅燈區吉原嘅「夕月」。開業超過40年嘅佢，唔單止係當地老牌泡泡浴店，喺日本嚟講亦係數一數二嘅老牌名店。佢之所以能夠經營到咁耐，係因為打從佢開業起，便將風俗店定位做一間高級泡泡浴店。為咗可以令佢睇起嚟更加豪華，內部不但以古典西方風格設計而成，更配以大量吊燈同埋傢俬，同時更開闢出多個超豪華嘅休息室，而獨立房間嘅設計同樣精美，配合高質素嘅泡姬，難怪佢單係110分鐘入浴料便要成25,000日圓（約1,750港元），仲未計到處至講嘅服務料，卻仍深得玩家歡迎。