東網電視
更多新聞短片

好多人會搞錯大阪燒同廣島燒,因為兩者確實幾似,仲有一款文字燒,知唔知有咩分別呀?
1/6
早幾日,兩位姊妹話要食大阪燒,仲話自己好撚手,煎得點好之類,OK,唔使出手對小編而言求之不得喇!殊不知兩位小姐最後係發脾氣齋食唔煮,唉~
事緣當日柯打咗幾款美食,其中一位小姐話簡單將所有材料攪勻煎成形就掂,然而,另一位見到有麵及雞蛋就話要分開煎至正宗,爭辯不休,新正頭,相嗌唔好口,於是要勞動到小編動手又動口,又煎煮又勸架,忙到一頭煙。
大阪燒VS廣島燒
平心而論,其實很多人都會搞錯大阪燒同廣島燒。因為兩者確實幾相似,只係烹調方法有所不同。大阪燒又名好味燒(おこのみやき),顧名思義係大阪名物,亦係關西庶民美食,其日文有「鍾意甚麼加甚麼」的意思,即是大家可以隨喜好放入配料與麵糊攪勻,倒入鐵板煎成一塊,之後唧上醬汁、沙律醬,灑上海苔粉及木魚絲即成,做法簡單。
而廣島燒(ひろしまやき),乃源自廣島的料理,要先在鐵板上倒入薄薄一層麵糊燒成麵皮,放入大量椰菜、芽菜、豬肉等配料,灑上少許麵糊以定型,同時在旁炒麵,跟住就是最難嘅步驟,就是將成座山咁高嘅廣島燒翻轉放到炒麵上,這時要在旁煎蛋,趁蛋未熟就將差不多熟嘅廣島燒放上去,燒到咁上下再翻過來,灑上調味料同醬汁即成。
東京名物文字燒
除了大阪燒同廣島燒非常近似外,愛遊東京的哈日族應該仲會聽過,甚至食過文字燒。屬關東、尤其是東京名物的文字燒(もんじゃやき),有說源自戰後窮家父母為了提高孩子學習興趣,用麵粉混合糖於鐵板上寫字,學習完就當零食來吃,時至今日,用料當然好唔同,但其烹調及食用方法則與大阪燒及廣島燒非常之唔同。
首先用上大量椰菜及配料,在鐵板上炒至軟身後圍成環狀,將麵糊倒入中間空位,當見到麵糊煮到滾起後,就與椰菜同配料混合,大家從小鏟沿文字燒外圍按壓取出來品嘗,之不過,由於係邊燒邊吃,如果食得慢,會唔會燶底先?

大阪燒只需將所有食材及麵糊攪勻,倒入鐵板燒至定型即成。(互聯網圖片)

文字燒屬東京名物之一,製作有別於大阪燒及廣島燒,要先將椰菜及配料放到鐵板上炒至軟身,之後圍成環狀,將調咗味嘅麵糊倒到椰菜配料的環狀中空位置,煮滾拌勻即可。(互聯網圖片)

大阪燒燒至成型後,塗上醬汁、唧上沙律醬、灑上海苔粉及木魚絲來吃,十分美味。(互聯網圖片)

文字燒的食法獨特,大家會用小鏟鏟起外圍直接放入口食用。(互聯網圖片)

廣島燒的烹調相對於大阪燒繁複得多,用上大量椰菜,加入炒麵及煎蛋,最後加入醬汁調味而成。(互聯網圖片)