開箱男：重拾童年　迷你世嘉MD經典85合一

提起SEGA世嘉， 80-90年代它曾是雄霸一方的遊戲主機生產商，當時世嘉Mega Drive強撼任記紅白機，憑着大量街機移植作而為人所熱捧。AtGames早前推出復刻主機「Sega Mega Drive Flashback HD」，內藏《超音鼠》、《戰斧》等85款經典遊戲，仲罕有支援MD卡帶同原裝手掣，今鋪床下底啲「國寶」可以重見天日喇！

今次開箱的SEGA Mega Drive Flashback HD，包裝盒已印滿收錄遊戲作品，打開可見主機、2個手掣、HDMI輸出、火牛以及說明書。先講機身，主機設計沿自1988年第一代Mega Drive的外形風格，全黑機身表面保留了醒目的「16 BIT」字樣和啟動時的紅燈標識，左側又具備電源和Menu按鍵，只是主機尺寸幾乎是原版的一半，僅重320g跟罐裝汽水差不多。雖然是復刻版本，但新機就支援HDMI 720P高清輸出。至於跟機兩個同比例手掣，手感跟舊版一樣之餘仲搭載2.4GHz無線技術，省卻駁線煩惱。最特別的是主機保留卡匣插槽，前端也提供針位插口，完美對應MD遊戲卡匣和原廠手掣，收藏玩家肯定Like爆！

遊戲方面，迷你世嘉MD內建了Mega Drive、SEGA Master System、Game Gear等三大平台一共85款大作！而且方便易用的操作介面，只須按下Menu鍵即進入選單，點選每一款遊戲時仲提供作品簡介和按鍵操作說明，設計相當貼心。到實際試玩，遊戲畫面顯示模擬了傳統CRT電視的Scanline掃瞄線效果，復古味濃。而且內置的每款遊戲均提供10個Save檔，可即時儲存，加埋「7秒遊戲重播」功能，玩家可於攻略途中隨時按下重播鍵，重溫挑戰成果。唔講咁多，開箱男要回味《戰斧》、《超音鼠3D》同《真人快打3》啊！